Custa chi amus a contare est un’istòria istrana meda.

Semus chistionendu de su chi est capitadu a sessantunu personas chi sunt lòmpidas a su Tan Hill Hin, unu locale famadu in Richmond, in su Regnu Unidu pro iscurtare su cuntzertu de una cover band de is Oasis e pro bufare una pariga de birras, e a pustis torrare a domo issoro.

Imbetzes sunt abbarados cungiados in su pub pro more de sa niada manna chi est lòmpida su sero in sa tzitade inglesa, paris a su frius meda. Duncas totus is clientes de su locale sunt istados custrintos a s’abbarrare incungiados. Ma non si nde sunt ariolados meda. Is sessantunu personas s’ant bufadu chentinajas litros de birra e s’ant papadu totu cussu chi ant agatadu. Naramus chi de fàmene e de sidis non si sunt mortos.

Comente at contadu sa BBC, su locale in ue e s’est fatu su cuntzertu, est su prus in altu de s’Inghilterra – 528 metros a pitzu de su livellu de su mare – e s’agatat in su Parcu Natzionale de su Dales, in Yorkshire.

Cando is cantadores e totu sa gente sunt lòmpidos a su pub su tempus fiat giai malu, pro ite in totu sa zona est mancada sa currente eletrica, pro more de is matas chi ant segadu filos elètzicos e blocadu is trasportos – cun s’autostrada printzipale cungiada -.

Sa situatzione at sighidu a peorare in pagas oras, e a s’agabbu de su cuntzertu sa ghenna de su locale non si podiat abèrrere, ca fiat cungiada dae prus de unu metru de nie.

Is meres e sa gente a intro de su pub, cando at bidu chi non fiat possìbile a torrare a domo issoro, si sunt organizados pro dormire, fàghende a mudas pro si corcare.

Sa matessi cosa est capitada sa die benente chi est passada iscurtende is cantzones de is Oasis, bufende birra e papende.

Is sucursos sunt lòmpidos sa de tres dies ebbia, e totus is sessantunu personas sunt istadas agatadas in cundiztiones bonas. Calcunu fiat cuntentu meda de custa aventura, antzis fiat peri dispiàghidu de èssere istadu sarbadu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22