At ingùrtidu su velenu de sa rana de sole 53 bias.

A ddu narre est Mike Tyson etotu, chi at afirmadu chi sa sustàntzia dd’at cambiadu sa vida. S’ex campione de is pesos màssimos de pugiladu at naradu chi sa prima bia chi dd’at impreada dd’est partu de èssere mortu.

In un’intervista a su New York Post, at cunfiadu sa dipendèntzia sua dae su velenu de sa rana de sole una sustàntzia allucinogena. At afirmadu de dd’àere fatu pro disafiu, sende chi in passadu fiat unu consumadore de drogas graes comente sa cocaina

Tyson at naradu chi s’aversàriu prus tostu chi apat mai afrontadu fiat issu matessi, sende chi teniat pagu autostima de issu, ma de tènnere unu ego mannu ma su velenu de s’anfìbiu dd’at abertu is ogros.

Sa sustàntzia in chistione est bogada dae su “Sonoran Desert Toad”, una rana de sole chi colat sete meses a s’annu bivende sutaterra e si benit pipadu, tenet efetos allucinògenos e psichedèlicos.

Mike Tyson, a su giornale istadunidensu, at cunfessadu de èssere devènnidu dipendente de su velenu e de àere cuncordadu una pesadura de custos animales de su desertu de Sonora in su possedimentu suo in su Sud de sa Califòrnia.

Su pùgile americanu at naradu chi sa gente si nd’est abigiada de cantu siat cambiadu e chi sa mente sua no est bastante sofisticada pro cumprèndere ite siat sutzèdidu, ma sa vida sua est in manera megiorada.

Tyson at afirmadu chi su velenu dd’at fatu lòmpere a su màssimu potentziale e immoe bidet su mundu in modu diferente, e intendet chi totus sunt uguales e totu est amore.

De seguru sa cunfessione a su giornale de s’ex campione de pugiladu no est chi sia sàbia meda, gasi comente sa detzisione sua de torrare a cumbàtere a s’edade de 54 annos – un’annu a oe, parègiu contra Roy Jones – ma issu est abituadu a fàghere cosas inusuales.

Oe a 55 annos sighit a s’allenare documentende in is retes sotziales de sa grandu abilidade sua in sa boxe. Giustu pro ddu subènnere: 35 annos a oe, su 22 de onniasantu 1986, deveniat campione de su mundu a s’edade de 20 annos, su prus giòvanu de semper a nche resèssere. Fiat devènnidu su primu pesu màssimu a unificare totu is campionados de su mundu, binchende fintzas is tìtulos Wba e Ibf.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22