Unu fàmine malu a pràndere.

A su puntu de èssere intradu a sa lista niedda de unu ristorante tzinesu pro àere postu in ghenugros s’atividade gastronòmica cun su sistema de s’all you can eat, “papa cantu boles”.

Su locale, ispetzializadu in pastos de màndigu a sa grìllia, at dèvidu pigare custa detzisione a pustis de is papadas esageradas de s’òmine, connotu comente Mr Kang, capatzu de papare sena mesura a prètziu fissu.

Gasi s’interessadu at contadu a s’emitente televisiva Hunan TV de èssere istadu bogadu dae s’Handadi Seafood Bbq Buffet in sa tzitade de Changsha, cabulogu de s’Hunan, una provìntzia de sa Tzina tzentru-meridionale.

A su chi ischimus paret chi s’òmine in ocasione de sa prima bìsita a su locale apat mandigadu unu chilu e mèdsu de pees de porcu. In ocasione de sa segunda bìsita s’òmine s’est presentadu meda prus famidu, e nche at ingùrtidu una safata belle bator chilos de cambarones.

Mancari custu, a pustis de su bandu proclamadu dae su locale, su sennore Kang s’est chesciadu de èssere istadu discriminadu dae su ristorante, solu pro more de s’apetitu suo. Difatis s’òmine at naradu chi no est curpa sua si tenet semper fàmene.

Su istorradore però at pretzisadu chi is bìsitas repìtidas de mister Kang ant arriscadu de ddu fàghere serrare. Difatis ogni bia chi s’òmine s’est presentadu su locale nche at pèrdidu una chentina de yuan – sa valuta in cursu in sa Repùblica populare tzinesa -. Bastas a pensare chi, segundu su titulare de su ristorante, s’òmine diat èssere capatzu de bufare 20 o 30 ampullas de late de soia: in pagos faeddos unu putzu sena fundu.

Su fatu devènnidu virale in is retes sotziales tzineis, at fatu prus de 250 milliones de visualizatziones in Weibo, una de is prataformas prus famadas in Tzina.

Diferentes e brullanas is reatziones e is cummentos a sa noa.

Calicunu at cummentadu chi su ristorante non diat dèvere èssere unu locale “all you can eat” si non si podet permìtere clientes de custu tipu. Ma non mancat s’ironia, difatis ddoe at chie at propostu a mister Kang una gara a chie papat de prus… Amus a bìdere comente nche at a agabbare.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

TikTok, AI e sa manera noa de sos giòvanos de fàghere sas chircas online

In sos ùrtimos annos, sa manera de chircare novas de sos giòvanos est mudada in manera profunda. Si unu tempus Google e sas entziclopedias online fiant su puntu de partèntzia primàriu, oe no est prus gasi. Pitzocos e pitzocas meda preferint trastos de inteligèntzia artifitziale, chat innovativas e prataformas social comente TikTok, in ue vìdeos curtzos e crarimentos lestros permitint de cumprèndere luego sos cuntzetos dificultosos.

A bortas dae sos motores de chirca clàssicos non bi passant nemmancu. Sa chirca no est prus liniare e isulada. Sos giòvanos passant in presse dae vìdeos a post, dae link cumpartzidos in chat de grupu a discussiones in comunidades online. De custa manera sa chirca si faghet dinàmica e collaborativa: si passant sos pàrreres pari-pari, si ponent a cumone sas fontes e si ponent a cunfrontu sas novas in s’istante. Custu critèriu tenet de bonu chi est lestru e vàriu, ma bi cheret sensu crìticu ca non totu su chi s’agatat online est seguru o bene fatu.

Sos trastos de AI, pro esempru, permitint de tènnere rispostas in s’istante, curtzas e adatadas a chie preguntat, imbetzes TikTok e àteras prataformas social dant crarimentos visivos chi agiuant a ammentare mègius sas informatziones. Però, sa lestresa de s’impreu podet causare una connoschèntzia incumpleta, e duncas est de importàntzia manna a ischire chircare sas fontes giustas, a pònnere a cunfrontu argumentos diferentes e a organizare sas informatziones in manera informada.

Non cheret ismentigadu poi chi finas aplicatziones comente WhatsApp dant possibilidade de interrogare s’Inteligèntzia Artifitziale subra de tantas chistiones. A sa fine de sos contos, sos giòvanos de oe si movent in unu panorama digitale dificultosu ma prenu de oportunidades. Chie est bonu a impreare custos trastos cun impignu resurtat a mudare sa velotzidade de sa Retza in connoschèntzia cuncreta, impreende in sa mègius manera sa cantidade ispantosa de informos disponìbiles cun unu click.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”