Carles Puigdemont est istadu acapiadu, erisero a tardu, in s’aeroportu de S’Alighera.

S’ex presidente catalanu est istadu firmadu dae is carabineris chi dd’ant acumpangiadu in presone pro more de un’òrdine europeu pedidu dae is autoridades ispagnolas.

Pro bona sorte sua però, Puigdemont est istadu liberadu giai custu mangianu pro detzisione de su giùighe, chi in is chidas colada at a detzìdere chi atzetare sa rechesta de estraditzione pedida dae s’Ispagna.

Una befa a beru, pro s’ex presidente de èssere istadu firmadu in S’Alighera, chi est una tzitade sarda cun un’istòria e una traditzione catalana.

Ma proite Puigdemont s’agatat in Sardigna? Est lòmpidu pro chistionare in un’atopu tra indipendentistas e polìticos sardos. Difatis tra is àteros, a dd’aspetare ddoe fiant su presidente de a Regione Christian Solinas e su presidente de su Consìgiu regionale Michele Pais.

Ma custu no est istadu possìbile, pro ite comente su catalanu est faladu dae s’aeroplanu, est istadu firmadu dae is guàrdias e acumpangiadu a sa lestra a su càrtzere de Bancali, in Tàtari. Sa noa de s’acàpiu de Puigdemont s’est ispainada in totu su mundu.

In su tempus coladu s’ex presidente at giai tentu problemas cun sa giustìtzia. Difatis in su 2017, sa procura de Madrid ddu boliat fàghere impresonare pro more de su referendum pro s’indipendèntzia de sa Catalugna dae s’Ispagna. Puigdemont pro no acabbare in presone si fiat fuidu a Brussellas su 30 de mese de ladàmine. Dae bator annos a oe s’ex presidente no est torradu in sa terra sua, pro ite est istadu emanadu un’òrdine internatzionale de arrestu. Difatis est istadu firmadu fintzas àteras bortas, comente in Germània, ma su pròpiu est istadu liberadu dae su tribunale.

In su 2019 Puigdmont est istadu votadu in su consìgiu europeu e comente parlamentare dd’ispetat s’immunidade, mancari non siat reconnota dae s’Istadu ispagnolu.

Duncas, amus a bìdere ite at a capitare in Sardigna, ma semus seguros chi is ogros de totus is indipendentistas de su Mundu ant a èssere in pitzu de su tribunale sardu chi at a giudicare a Puigdemont.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Bona meda sa prima partida de Walter Mazzarri in sa banchita ruju-blu, chi at ghiadu su Casteddu a s’Istàdiu Olimpìcu de Roma contra sa Lazio, a pustis de su lissentziamentu de Leonardo Semplici.

S’iscuadra sarda at giogadu una gara bella, ispassiosa e gherrada, comente is casteddajos non giogaiant dae tempus meda.

Su Casteddu est istadu prus perigulosu de sa Lazio giai dae su primu tempus, e in duas ocasiones est andadu a curtzu de su primu gol: prima cun Keita Balde e a pustis cun Nandez.

Ma sunt is meres de domo, a coa de sa prima parte de giogu, chi ant agatadu su vantàgiu: gràtzias a un’iscuta de conca de su tzentru a in antis Immobile chi at collionadu su defensore sardu Carboni, e est resèssidu a marcare sa rete a Cragno.

Is òmines de Mazzari però agatant su parègiu a su comintzu de su segundu tempus, gràtzias a su capitanu Joao Pedro. S’atacante ruju-blu est bravu a fàghere un’iscàmbiu cun su tzentrucampista Marin chi at serbidu su cumpàngiu brasilianu chi at fatu unu gol a su portieri latziale Reina cun unu corpu de conca.

S’iscuadra biancu-tzeleste a proadu a torrare a in antis cun su puntègiu, ma su Casteddu at gherradu semper e cun s’argentinu Nandez at fertu unu palu. A pustis una pariga de minutos, sunt galu is sardos a marcare unu gol, custa borta cun Keita Balde – ex giogadore latziale chi pro cussu no at festadu -, serbidu dae Joao Pedro.

S’allenadore Sarri, in tribuna pro iscualìfica, pro chircare su parègiu at naradu a Martusciello – segundu allenadore eris in sa banchita a su postu suo – de fàghere intrare in campu a Cataldi e a Zaccagli.

Su Casteddu s’est cungiadu in defensa, e su portieri Cragno at fatu una pariga de paradas bonas a beru. Ma cussu puru nudda at pòdidu cando Cataldi at agatadu su gol de sa domìniga in is ùrtimos minutos de sa gara, cun un’iscuta dae foras de s’àrea e cun sa botza chi est andada a suta de sa rugrada de is palos.

Su Casteddu a pustis est abarradu in deghe òmines pro sa bogada de su tertzinu Zappa, ma sa partida est acabbada cun su resurtadu de 2-2.

Unu puntu bonu pro s’iscuadra de Mazzarri, chi faghet comintzare bene s’aventura sarda noa de s’allenadore toscanu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22