Dae sas marinas de Vignola a sa basìlica de Sacàrgia, dae sa roca de Casteddu Sardu a su casteddu de Tzaramonte, dae sa crèsia de Santu Antiogu de Bisarcio in Otieri a su putzu sagradu de Nulvi, dae sa foghe de su Coghinas a sa crèsia romànica de Santu Pedru in Bultzi, colende dae su tzentru istòricu de S’Alighera e dae sos sartos de sa Gaddura.

De ita semus faeddandu? De su Fèstival “Musica in is bucas”chi s’at a fàghere su mese benente in 16 comunos de su nord de Sardigna. In totu custos iscenàrios de biddas, dae su 1 a su 29 de austu, est organitzadu su de bintunu editziones de sa famada manifestatzione internatzionale.

Ant a èssere bintisete cuntzertos in 19 localidades in unu cuntestu paesagìsticu de grandu bellesa a beru.

Su Fèstival est organizadu dae su sótziu Jana Project cun sa diretzione artìstica de su maistru Enzo Favata. Sa manifestatzione at a propònnere nùmenes balentes de su jazz comente su percussionista Trilok Gurtu , su duetu cun su percussionista Mino Cinélu e su trumbiteri Nils Petter Molvaer, e su cuartetu de su sassofonista istadunidensu Seamus Blake, cun unu programma chi at a èssere cumpletadu cun su cuntzertu de Giorgio Li Calzi e Manuel Zigante e cun s’addòbiu a s’arbèschida chi domìniga 22 at a bìdere protagonista sa violinista Anais Drago.

Ma protagonistas de custa editzione ant a èssere fintzas artistas chi ant fatu s’istòria de sa mùsica jazz in Itàlia: su baterista Roberto Gatto  – s’11 de austu in Costa Paradisu cun su suo Perfect Trio – e sa cantante Ada Montellanico  – acumpangiada su 29 in Tergu dae su pianista Enrico Zanisi -, paris cun nùmenes istòricos de sa mùsica italiana comente a Mogol e s’Orchestra Medit Voices  – su 26 a S’Alighera -, su triu de Peppe Servillo, Javier Girotto e Natalio Mangalavite – su 17 a sa foghe de su Coghinas a Codaruina -, e a musitzistas balentes comente a Francesco Orio e Vittorio Cuculo – ambos a Sènnaru su 16 de austu, in triu e in cuartetu -, sos chiterristas Paolo Angeli – su 19 a Maltis – e Marcello Peghin – su 23 a Laerru – e sa violista Luciana Elizondo – a s’internu de sa basìlica de Sacàrgia, a Codronzanu su 28 de austu -.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Brevettes,Italia intre sas primas deghe in Europa: sinzales positivos mancari sa minimada.

Fintzas si si registrat una minimada pitticca in su numeru de sos brevettes, s’Italia resessit su mattessi a bintrare intre sos primos 10 Paisos in Europa. In su 2025,dittas e imbentores italianos ant presentadu 4.767 dimandas de brevettes, unu datu chi est minimadu de pagu cunfrontadu a s’annu passadu. Mancari custa minimada,peroe,s’Italia resessit a mezzorare sa posissione sua in sa classifica,arrivande a su postu 10 in su mundu e cunfirmandesi intre sos Paisos europeos prus attivos in custu campu.

Su campu chi si mustrat prus forte est cussu de sas carraduras e de sas macchinas, chi sighit a creschere mancari in su mentres atteros campos abbraccant.Appena pustis si agattant sas tennologias ligadas a sa movida de sas mertzes,comente sistemas de carradura e imballazu,sighidas dae macchina ispetziales e inzenneria tzivile. Unu cinnu positivu arribat fintzas dae sa creschida de su brevette unicu europeu, una cosa chi permittit de diffendere un’imbentu in prus Paisos cun d’una dimanda sola. Custa cosa faghet divennere simples sas protzeduras e minimat sos pretzios,facilitande pro sas ditta pitticcas e medias, ma fintzas pro sas universidades e tzentros de chirca, de tutelare sas ideas insoro e las ponnere in su mercadu.

Propriu in su campu de sa chirca pubbrica si annodittat su Cunsizzu Natzionale de sas Chircas, chi si cunfirmat intre sos interpretes printzipales in Italia e tenet unu bonu risurtadu fintzas a livellu europeu. Custu mustrat s’importantzia de sa chirca pubbrica po agguantare s’isviluppu e creare opportunidades novas. Mancari sos signales chi dant corazzu, addurant peroe difficultades. Sa minimada, mancari pitticca, in su numero de sos brevettes mustrat chi bi est ancora bisonzu de accomettare de prus sas dittas e sos imbentores, mescamente in d’unu campu internatzionale semper prus in cumpetissione. In prus,est de fundamentu minimare sas differentzia in sas zuras de s’Italia.

In tottu custu, s’Italia mustrat de tennere ancora capatzidades bonas in su campu de modernizzassione,resessinde a mantennere unu postu importante in Europa. Intamen, po mezzorare de prus at essere netzessariu imbestire de prus in sa chirca, accomettare sas dittas e azzuare sos zovanos a revertire sas ideas insoro in disignos chi si pottant faghere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22