Ant a pòdere torrare unu pagu de bentu medas famìlias sardas in dificultades càusa de sa difusione de su COVID-19.

Sa regione at postu a disponimentu una bella summa de dinare pro parare fronte a una situatzione epocale drammàtica chi bona parte de sa populatzione isulana est bivende.

Su Cussìgiu regionale de sa Sardigna at aprovadu a manera comuna su DL 126/A “Medidas istraordinàrias apretosas pro agiudare sas famìlias a afrontare s’apretu econòmicu – sotziale causadu dae sa pandemia”.

Su provedimentu previdet unu contributu de 800 èuros a su mese, pro duos meses, a cada nùcleu familiare residente in Sardigna sena rèditu o chi, a pustis de s’apretu Covid-19, s’agatet in s’impossibilidade de prodùere rèditu. Pro sas famìlias cun medas fìgios, cun prus de sos tres personas, est prevìdida una summa de 100 èuros in prus a persone.

Comente giai mentovadu, sas fortzas polìticas de majoria e opositzione de s’assemblea regionale, ant votadu cumpatas a s’aprovatzione de custas medidas istraordinàrias. In custu momentu, sas brigas tra partidos sunt istadas postas a una banda, e s’est traballadu unidos pro agatare un’acòrdiu.

Su provedimentu tenet una cobertura de 120 milliones de èuros. Sas risursas ant a èssere trasferidas a sos comunos chi s’ant a ocupare de intregare su dinare cunforma sos critèrios istabilidos dae sa Giunta Regionale.

Pro custas mesuras, pigadas dae su Cussìgiu Regionale pro parare fronte a sas dificultades econòmicas de sas famìlias sardas, Matteo Salvini at fatu sos cumplimentos a Christian Solinas pro sos 120 milliones postos a disponimentu.

Su capu de sa Lega at torradu a espressare s’istima sua a su Presidente de sa Regione Sardigna, binchidore de sas ùrtimas eletziones sardas gràtzias fintzas a s’alleàntzia cun su partidu de su Carroccio.

«In s’ora chi su guvernu ponet 400 milliones ebbia pro totus sos italianos, sa Regione Sardigna ponet 120 milliones pro sos tzitadinos suos ebbia, cun 800 èuros a familiare. Orgugliosu de sos sìndigos e guvernadores nostros, dae Nord a Sud».

Custos sos faeddos de Salvini, pubblicados dae s’ufìtziu de Imprenta de sa Liga in Senadu.

Bonas noas dae sa Regione Sardigna in custu perìodu istòricu dìligu meda a càusa de s’epidèmia de su coronavirus.

Difatis est istada posta sa firma a sa pròroga de is cuntratos cun Alitalia chi at a garantire, a cumentzare dae su 17 de abrile chi benit , sa bèndida de is billetos in continuidade territoriale.

Is rotas interessades ant a èssere: Casteddu-Roma, Casteddu-Milanu, S’Alighera-Roma e S’Alighera-Milanu.

Ddu faghet a ischire in una nota su Guvernadore de sa Sardigna Christian Solinas. “Peri in custu momentu malu chi semus colende, amus traballadu pro assigurare a is sardos su deretu a sa mobilidade, a su mancu cando sa situatzione at a torrare a sa normalidade” – custos is faeddos de su Presidente de sa Regione Sardigna -.

Tocat a nàrrere chi a pustis de sa protzedura de emergèntzia in s’iscalu de Terranoa, is ufìtzios de s’assessoradu regionale de is Trasportos ant fintzas provididu a agiudicare s’assegnatzione de is rotas a Alitalia chi duncas at a pòdere, dae sa die etotu, cumentzare a bèndere is billetes pro is rotas Terranoa-Roma e Terranoa-Milanu.

Immoe is collegamentos aèreos pro s’Ìsula sunt belle totu firmos, a pustis de s’ordinàntzia de su Guvernadore Solinas. Difatis a càusa de s’apretu pro su COVID-19 sunt abarrados ativos solu is cullegamentos essentziales cun s’aeroportu de Roma Fiumicino.

Unu passu importante a pustis de is chistiones de is meses coloasos a pitzu de is bolos in regìmene de continuidade territoriale tra sa Sardigna e s’Itàlia.

Difatis su bandu pretzedente de is billetes a prètzios iscontados, diat èssere iscadidu su 16 de abrile benente, e custa pròroga at a permìtere sa ripresa de is prenotatziones. Immoe tocat a isetare su pròssimu bandu chi at dèpere èssere pubblicadu intro su 31 de mese de idas 2020.

Totu custu nde fiat essidu a campu durante s’adòbiu tra sa ministra de is Trasportos Paola De Micheli, su guvernadore Christian Solinas e su presidente de su Cussìgiu regionale Michele Pais.

Ma dae su deghennoe de freàrgiu sunt cambiadas medas cosas, cun una situatzione natzionale de apretu dèpida a s’ispàinu de s’epidemia.

Si nd’at a torrare a allegare tra una pariga de meses, bidu chi pro s’ora su Presidente de sa Regione tenet àteru de pensare, prima de totu a sa sanidade sarda e a su modu de afrontare s’epidèmia de su coronavirus.