Ant a èssere is ispàtzios de Sa Manifatura de Casteddu (logu de addòbiu e de apartenèntzia, ispàtziu cuncretu de iscàmbios a disponimentu de sa creatividade artìstica, culturale e sientìfica de totu is sardos), a acollire sa segunda editzione de su fèstival Signal Reload, sa rassigna dedicada a sa mùsica eletrònica e a s’isperimentatzione curada e organizada dae s’assòtziu TiConZero, tzentru de produtzione e chirca artìstica multidisciplinare suta de sa diretzione artìstica de Daniele Ledda.

Dae su 20 de mese de ladàmine a su 13 de mese de idas su fèstival, chi ocannu si reconnoschet in su tema “tra sonos e bisiones”, s’at a articulare in oto apuntamentos cun a su tzentru artistas prus che totu sardos, cun sa punna de impreare s’improvisatzione ghiada, sa cumpositzione, s’iscritura e su vìdeu a su servìtziu de sa narratzione.

Tra is artistas protagonistas de sa segunda editzione sa manifestatzione aocannu contat su baterista, percussionista e isperimentadore Alessandro Cau, su progetu dedicadu a sa cumpositzione istantànea Snake Platform, su produtore e cumposidore Carlo Orrù, sa cumposidora Tuna Pase, su progetu Scrondo e Alek Hiddel, progetu nou de su prodotore e mùsicu sardu Dario Licciardi.

«Sa missione de s’Assòtziu TiConZero est basasa subra de is risursas artìsticas e creativas de su territòriu, non comente cramada ocasionale, ma comente manifestatzione de unu laboratòriu permanente – contat su diretore artìsticu Daniele Ledda -, miradu a sa creatzione de una rete acanta is nodos sunt semper ativos in sa produtzione e isperimentatzione.

Sa rete in custu sentidu, pro impreare unu parallelu informàticu, est una rete locale. Unu nodu importante in custa rete est rapresentadu dae sa comunidade acapiada a su dipartimentu de mùsica eletrònica de su Cunservatòriu de Casteddu e de su progetu Snake de cumpositzione istantànea. Su fèstival Signal Reload 2019 “tra sonos e bisiones” si ponet, duncas, comente isvilupu naturale de su traballu de s’annualidade colada e naschet dae s’idea de impreare s’improvisatzione ghiada, sa cumpositzione, s’iscritura, su vìdeu e ddos pònnere a su servìtziu de sa narratzione. Sa narrazione s’isvilupat cun s’istòria de sa cultura umana e de is espressiones suas giai dae is printzìpios de sa tziviltade.

A su fèstival is artistas presentant, gasi, un’istòria issoro, una narratzione belle crara cun sa cale cumpartzint unu percursu umanu e estèticu issoro ».

Signal Reload est realizadu gràtzias a su contributu de sa Regione Autònoma de sa Sardigna, de su Comunu de Casteddu e de sa Fundatzione de Sardigna, cun su patrotzìniu de su Cunservatòriu de Mùsica G. P. da Palestrina de Casteddu.
Totu is apuntamentos sunt a indonu
SU PROGRAMA – Sa segunda editzione de su fèstival Signal Reload at a cumentzare domìniga 20 de mese de ladàmine a is 20.30 cun sa performance de Alessandro Cau, baterista, percussionista, isperimentadore, improvisadore e performer in su palcu de Sa Manifatura pro presentare s’ùrtimu progetu discogràficu suo, s’album “Brenti” prodùidu dae issu, sonadu e arrangiadu, e registradu acanta su Dirty Sound Studio de Legnano. Cau dae annos s’òcupat de didàtica in su mundu de sa bateria e de su ritziclu musicale, faghende addòbios e laboratòrios comente dotzente. In is annos colados at sonadu e collaboradu cun paritzos mùsicos e progetas musicales, comente Erik Truffaz, Gavino Murgia, Javier Girotto, Enzo Favata, Luca Aquino, Shain Moitia (Ex Models), Simon Francis (Ellie Goulding), Geoff Barrow (Portished), Lee Ranaldo (Sonic Youth) e at sonadu in teatros e fèstival in Itàlia, Frantza, Isvìtzera, Ispagna, Bèlgiu, Germània, Norvègia, UK, Tunisia, Etiòpia, Sèrbia e Giapone.

Dirittos, siguresa e cittadinantzia: in Casteddu cussiderassiones a inghiriu de s’eredidade de Enrico Berlinguer.

In su cuntestu de sa mustra “I luoghi delle parole” de Enrico Berlinguer, chi bi est in Casteddu, unu de sos abbenimentos a chizu at proponnidu una dibatta pubbrica supra sos dirittos de su tribagliu e sa cittadinantzia. Su cunsideru si est bene gurridu partinde dae s’eredidade politica de Berlinguer, chi at semper postu a su tzentru de s’assione sua su reconnoschimentu de sos dirittos de sos tribagliadores omines e feminas, sa dinnidade de s’occubassione e sa tutela de sos dirittos tziviles.

In su mentres de s’addobiu est naschida sa netzessidade de perrigare su fenomenu de s’aostare in sos referendum de s’8 e 9 de lampadas, favoressinde una partetzipassione sciente e demogratica chi no tenzat contu de chie est a favore o contrariu a sas dimandas. Si est faeddadu fintzas de su fenomenu de sos mortos in su tribagliu, chi sunt ancora medas, fenomenu chi incurpat a sa minimada de sos livellos de siguresa po more de sos appaltos e sub-appaltos.

Est bistada de prus evidentziada sa cumplessidade de sas politicas de cittadinantzia: dae una banda, s’escluisione de pessones chi sunt intregadas in manera perfetta in su pannu sotziale e de su tribagliu italianu, a sas cales benit negadu su riconnoschimentu formale; dae s’attera, s’abbusu de assentos comente sas residentzias farsas e su ricursu a ligamenes de famiglia attesu meda po alcansare sa cittadinantzia in manera iscurretta. Un’atteru tema accomettadu est cussu de sa precariedade de su tribagliu chi est creschinde meda, e chi oe corpat fintzas sas proffessiones de cherbeddu, dae una banda po more de sas tennologias novas e de s’intelligentzia artifitziale supra su mercadu de su tribagliu.

Sa mustra dedicada a Enrico Berliguer in Casteddu, in su Bastione, at giai tentu 14.000 presentzias, e si est tribagliande po la tennere abberta fintzas a su duos de lampadas, comente testimonia de s’interessu mannu chi at tentu po sa cittadinantzia.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22