Is obreris de sa Leva de s’88 de Àrthana, invitant a totus a partetzipare a sa Festa de Santu Fisente Ferreri, su 18, su 19, su 20 e 21 de austu 2018. Custu su programma de ocannu:

Sàbadu su 18 de austu
– A is 6 de merie, Santa Missa in sa crèsia de Santu Giuanne Batista
– A is 7, sa professone: su prèide at a beneìghere is cuadderis e ddis at a intregare s’istendardu pro nche bogare su Santu a crèsia de Santu Fisente, acumpangiadu dae is devotos e devotas cun sa bestimenta antiga de Àrthana, de is fosileris, de is grupos folk ogiastinos e sa partetzipatzione de is sonadores “Cuncòrdias de Ballu”.
– A is 8 in sa ismeritzada, ballos sardos in pratza de Suia cun su fisarmònitzista Micheli Fadda.
– A is 10 de note, in pratza de Suia, s’ispetàculu “Showzer” cun “Marvin e Dj Prezioso”, sighint ballos sardos finas a tardu mannu de note.

Domìnigu su 19 de austu
– A is 7.30 de mangianu, Santa Missa in sa crèsia de Santu Giuanne Batista
– A is 10.30, Missa in sa crèsia de Santu Fisente
– A is 5 de merie, giogos pro istentare is piciocheddos, Baby Dance e tzùcuru filadu, in is campetos de Mannoi, a palas de s’Hotel Murru, e sa partetzipatzione de su Tzentru Ecustre Monte Idolo chi at a fàghere su batizu de sa sedda pro is noitolos.
– A meritzeddu bia de is 8, ballos sardos in pratza de Suia cun su sonadore de fisarmònica Micheli Fadda.
– A is 10 e mesu de note, ispetàculu de su còmicu Daniele Contu e a sighiri Happy Hours Tributu a Ligague. Sighint ballos sardos finas a note tarda.

Lunis su 20 de austu
– A is 6 de merie, Santa Missa in sa crèsia de Santu Fisente
– A is 7, professone dae sa crèsia de Santu Fisente pro nche torrare su Santu a bidda, acumpangiadu dae is devotos e devotas a braga e fardeta antigos, de is fosileris, de is grupos folk ogiastinos e sa partetzipatzione de is sonadores “Cuncòrdias de Ballu”.
– A is 8, ballos sardos in pratza de Suia cun su sonadore de fisarmònica Micheli Fadda.
– A is 10 e mesu de note, cuntzertu in pratza in onore de “Giordana Dessì”, sighint ballos sardos finas a tardu de note

Martis su 21 de austu
– A is 7 de mangianu, su coroneri e is obreris passant de in domo in domo cun sa Corona pro pedire is ofertas.
– A is 8 de meritzeddu, ballos sardos in pratza cun su sonadore Micheli Fadda.
– A is 10, gara de is cantadores Mureddu, Ladu e Bitti acumpangiados dae su Tenore de Àrthana, sighint ballos sardos finas a tardu mannu de note.
Is obreris bos isetant in medas… e in ogna domu intrit Deus e Santu Fisente! Bonu ispàssiu a totus.

Intre delusione e identidade: sa Sardigna in su film nou de Bonifacio Angius

Dae su 30 de santugaine imbatet a sas salas Confiteor – Comente apo iscobertu chi non dia a àere fatu sa rivolutzione, su film nou de Bonifacio Angius, unu de sos registas prus originales e coerentes de su panorama tzinematogràficu italianu de oe.

A pustis de àere otentu su Prèmiu Lizzani in sa Mustra de su Tzìnema de Venèzia pro su mègius film, seberadu dae una giuria de gestores, s’òpera torrat in sa terra chi l’at fata nàschere e chi nde prenat s’ispìritu: sa Sardigna. Sa distributzione at a mòvere dae sas tzitades prus mannas e a pustis at a imbàtere a bellu a bellu a àteras salas meda, dae nord a sud de s’ìsula.

A pustis de una sèrie de anteprimas fatas in sas tzitades italianas prus importante, dae Roma a Bologna, dae Perùgia a Firenze, su film imbatet duncas “a domo” pro si riunire cun cussu pùblicu chi prus de sos àteros podet agatare sa sustàntzia profunda de su contu in sos paesàgios suos, in sos silèntzios e in sas caras. Fatu cun s’agiudu de sa Regione Autònoma de Sardigna, de sa Fundatzione Sardigna Film Commission e de àteros sòtzios natzionales, Confiteor si presentat comente un’òpera personale meda, ma chi podet faeddare a totus.

Est unu biàgiu profundu chi aunit su privadu e su polìticu, sa memòria e sa delusione, sa chirca de un’identidade in unu tempus in ue sos sognos de cambiamentu paret chi si depant isfàghere. Cun custu film nou, Angius cunfirmat s’istile suo ùnicu: assutu, deretu, ma prenu de un’umanidade bera e de una malinconia chi apartenet a sa terra sua. Sa Sardigna, una borta in prus, no est iscenàriu ebbia ma personàgiu biu, ispigru de sos turbamentos e de sas isperàntzias de totus.

In sos ùrtimos annos, su tzìnema sardu at connotu a beru una rinàschida. Gràtzias a registas comente Angius e a una generatzione de autores bonos a aunire sa fortza de sas raighinas cun unu puntu de vista modernu, s’ìsula s’est fata puntu de riferimentu in su panorama natzionale.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”