Tra pagu prus de duas chidas Dj Fanny at a averare unu de sos bisos suos prus mannos, su de sonare in su matessi palcu de unu de sos prus importantes dj de su mundu, Fatboy Slim, dae semper unu de sos ìdolos suos. Ambos duos s’ant a esibire in s’Òpera Beach Arena de su Poeto de Cuartu.

In sa prima intervista sua cuntzèdida a Vistanet, Andrea Turnu, in arte Dj Fanny, artista house chi mancari tèngiat sa sla est capassu de mixare petzos cun s’impreu de sos ogros ebbia, ait cunfessadu su bisu suo de bòlere sonare una die a Tomorrowland, unu de sos fèstivals musicales prus famados de su mundu. Tra pagu prus de duas chidas at a pòdere sonare in s’Òpera Beach Arena de su Poeto de Cuartu, in ue at at a donare coddu a unu de sos ìdolos suos de semper, su dj inglesu Fatboy Slim.

«Amigos mios, a nche creides in su karma? Deo unu pagu eja – at iscritu Dj Fanny a sos fans suos -. Sa chida colada, cando m’agataia in ispidale, apo retzidu una proposta meda particulare. Apo mutidu in chat a Davide Siddi, s’organizadore de un’eventu importante meda pro pedire si b’aeret una zona adata pro acollire a mie e a sos assistentes meos pro pòdere assistire a s’eventu. Comente risposta apo retzidu sa proposta de partetzipare comente protagonista a cussu eventu. Amigos meos, bos comùnico ufitzialmente chi su 7 de mese de argiolas apo a èssere in su palcu de s’Òpera Beach Arena, a su Poeto de Cuartu, pro sonare in su matessi palcu de Fatboy Slim, un’artista chi sigo dae paritzu tempus e chi arguai manchet in sa listas musicales preferidas meas! Bos iseto a totus in cue pro s’eventu de s’istiu!».

Tzinema sardu, arribat su film”Bandidos e Balentes de Fabio Manuel Mulas

Si sunt faghinde sas represas de su film “Bandidos e Balentes”, su disignu tzinematografficu novu de su regista sardu Fabio Manuel Mulas, chi at a bessire intre pagu tempus. Su film contat un’istoria ambientada in sa Sardigna de su passadu e s’ispirat a sos contos e mudas ligadas a su fenomenu de sos bandidos in s’isula.

Mulas est unu regista e autore sardu chi dae annos tribagliat in su mundu de su tzinema indipendente. In sos tribaglios suos dat attentzione particulare a s’istoria, a sa cultura e su connottu de sa Sardigna. Sa tiza battit supra s’ischermu unu mundu fattu de connottu, gherras e vida in sas zuras internas de sa Sardigna.

Sas mudas sunt ambientadas in sos annos Chimbanta e mustrant comente sa vida de sas pessonas esseret signada dae vindittas e cunfrontos diffitziles intre familias e bandidos. A su tzentru de s’istoria bi sunt pessonas divressas sas vidas de sas cales cambiant propriu pro more de custu clima de tesone e violentzia.

Su film cheret contare non solu su bandizadu ma fintzas sa cultura e sas bistas de s’isula. Sos montes de intro, sas biddas e sas campagnas de sa Sardigna faghent de irfundu a sas mudas de sos attores e mustrant una terra antiga e forte, ligada in manera funguda a su connottu suo.

In su “cast” medas piccioccos sardos, calicunu a sa prima esperientzia, ma fintzas s’attora sarda Caterina Murino, nodida a livellu internatzionale pro sos rolos suos in su tzinema e sa televisione. Sa partetzipassione sua est unu balore in prus po su disignu e at a dare unu contribbudu e faghere biere de prus su film. Sar represas sunt appassionande paritzos logos de s’isula e sunt attirande s’attentzione de appassionados de tzinema e curiosos.

S’intentu de su regista est de contare una pagina de s’istoria sarda pro mesu de unu limbazu tzinematografficu capatze de aunire assione, dramma e connottu. Cun s’essida chi si prevedit in sos meses imbenientes,”Bandidos e balentes” puntat a che leare supra de s’ischermu mannu un’istoria ligada a sa Sardigna in manera funguda, balorizzande s’iscrocca e sas raighinas culturales suas. Su film est fintzas un’occasione pro faghere connoschere a su pubbricu una parte importante de sa memoria istorica de s’isula pro mesu de su tzinema.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22