In su 2050 sa populatzione mundiale s’at a atestare a inghìriu a sos 10 milliardos de persones. Su continente prus populosu at a èssere torra s’Àsia, cun belle 5 milliardos de persones, ma at a tènnere una crèschida esponentziale fintzas s’Àfrica: in sos 100 annos imbenientes at a arribbare a tènnere 4,4 milliardos de persones, respetu a sos atuales 1,2 milliardos, unu bellu guùmpidu a in antis.

S’ùnicu continente in contratendèntzia at a èssere s’Europa cun un’andamentu demogràficu negativu. S’Itàlia, in lìnia cun s’andamentu negativu europeu, at a pèrdere 10 milliones de abitantes.

Sàbadu su 13 de maju, in ocasione de sa manifestatzione Incungias, a sas h. 16:00 acanta sa domo museu Sa Domu de is Ducus, s’at a tènnere unu cunvegnu a pitzu de s’ispopulamentu de is biddas.

Ant a presentziare sos autores de su testu “Spop istantanea dello spopolamento in Sardegna” Cocco, Fenu e Lecis Cocco-Ortu. At a èssere presente fintzas su Presidente de Anci Sardigna Emilano Deiana.

Intre delusione e identidade: sa Sardigna in su film nou de Bonifacio Angius

Dae su 30 de santugaine imbatet a sas salas Confiteor – Comente apo iscobertu chi non dia a àere fatu sa rivolutzione, su film nou de Bonifacio Angius, unu de sos registas prus originales e coerentes de su panorama tzinematogràficu italianu de oe.

A pustis de àere otentu su Prèmiu Lizzani in sa Mustra de su Tzìnema de Venèzia pro su mègius film, seberadu dae una giuria de gestores, s’òpera torrat in sa terra chi l’at fata nàschere e chi nde prenat s’ispìritu: sa Sardigna. Sa distributzione at a mòvere dae sas tzitades prus mannas e a pustis at a imbàtere a bellu a bellu a àteras salas meda, dae nord a sud de s’ìsula.

A pustis de una sèrie de anteprimas fatas in sas tzitades italianas prus importante, dae Roma a Bologna, dae Perùgia a Firenze, su film imbatet duncas “a domo” pro si riunire cun cussu pùblicu chi prus de sos àteros podet agatare sa sustàntzia profunda de su contu in sos paesàgios suos, in sos silèntzios e in sas caras. Fatu cun s’agiudu de sa Regione Autònoma de Sardigna, de sa Fundatzione Sardigna Film Commission e de àteros sòtzios natzionales, Confiteor si presentat comente un’òpera personale meda, ma chi podet faeddare a totus.

Est unu biàgiu profundu chi aunit su privadu e su polìticu, sa memòria e sa delusione, sa chirca de un’identidade in unu tempus in ue sos sognos de cambiamentu paret chi si depant isfàghere. Cun custu film nou, Angius cunfirmat s’istile suo ùnicu: assutu, deretu, ma prenu de un’umanidade bera e de una malinconia chi apartenet a sa terra sua. Sa Sardigna, una borta in prus, no est iscenàriu ebbia ma personàgiu biu, ispigru de sos turbamentos e de sas isperàntzias de totus.

In sos ùrtimos annos, su tzìnema sardu at connotu a beru una rinàschida. Gràtzias a registas comente Angius e a una generatzione de autores bonos a aunire sa fortza de sas raighinas cun unu puntu de vista modernu, s’ìsula s’est fata puntu de riferimentu in su panorama natzionale.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”