Sa epidemia reghente de limba blau, chi at corpadu sa zootennia sarda, sighit a faghere affuscare meda sos pesadores de s’isula, non solu po sas cunseguentzias pesantes meda po s’accolomia, ma puru po sos problemas graves de sa sanidade.

Sa situassione de emergentzia at custrintu sa Coldiretti Sardigna a si movere in presse meda, mandande una littera a sos assessores regionales de su Laurantza e de sa Sanidade, in sa cale si apprettat sa cunvocatzione lestra meda de sa mesa tennica regionale supra s’apprettu. S’organizassione at evidentziadu medas chistiones critigas a sas cales bisonzant remedios chi siant lestros e balidos, cumprendinde su sistema de indennizos, sos vatzinos, su controllu de sas cundiduras e sa netzessidade de ponnere in campu solutziones meda tempus a innanti.

Coldiretti, evidentziat s’apprettu de interessare sos pesadores in sas detzisiones chi si ant a leare. Segundu s’organissasione, est de fundamentu chi si diant novas craras supra su chi si faghet po parare sa maladia. Sos pesadores dimandant rispostas lestras meda, cunsiderande chi su campu non si podet permittere istentos o mancantzia de cordinamentu, e nemancu un’iscarrigu de responsabilidade supra de sas impresas.

Un’attera cosa de fundamentu po frimmare sa maladia, est s’importantzia de una campagna de vatzinos balida e de soso ispedientes po s’annu imbeniente. Bell’e gai s’organissasione non si allindat a evidentziare su rolu de fundamentu de su vatzinu, ma evidentziat puru sa netzessidade de faghere meda pius cosas po cuntrastare s’irribbiu chi batit sa limba blau. Po accomettare in manera importante su problema, Coldiretti dimandat un’accreschimentu de sos fundos destinados a sa battalla contra s’isparghimentu de s’irribiu, po mesu de interventos chi mirant  poderare progettos de isperimentatzione iscientifica chi potant dare solutziones pius balidas.à

S’organissasione evidentziat puru s’importantzia de faghere prevensione. Donz’annu, cun s’arrivu de s’istagione carda, su virus torrada a amminettare sa zootennia de sa Sardigna, faghinde dannos mannos meda a sas dittas. Po custu motivu, Coldiretti pensat chi siat netzessariu unu pianu funtzionale e istrutturadu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22