Edifìtziu “Su Màrmuri”. Su Comunu de Ulassa chircat unu gestore nou.

Sa bidda de Ulassa tenet ispera bona pro custa istade. Comente a ogna annu sa bidda de su bacu de su Pardu at a abèrrere is ghennas suas a totus is istràngios chi in s’istajone bella faghent bìsita a su museu de s’Istatzione de s’Arte e a is bellesas naturales e paesagìsticas de su sartu suo. Su logu prus bisitadu at a èssere sena duda Su Màrmuri, postu a unu chilòmetro ebbia de sa bidda, acantu si podent ammirare is grutas prus bellas, mannas e ispantosas de totu Europa. Finas ocannu ant a èssere postos a disponimentu de is turistas medas servìtzios, comente , pro esempru cussu de nolègiu de is bitzicletas, afidadu ocannu a sa dita E-Motion de Ulassa. S’edifìtziucomunale “Su Marmuri”, dae impreare comente istrutura turìstica, isetat galu unu gestore nou. Pro custa resone s’amministratzione comunale ghiada dae Franco Cugusi at abertu unu bandu pro s’afidamentu de su locale a sugetos siat privados, siat sotzietàrios. Is binchidores de sa gara ant a dèvere firmare unu cuntratu de 9 annos chi s’at a pòdere illonghiare de àteros ses annos. Totu is domandas devent arribare a su Comunu de Ulassa intro e no addae de mesudie de su 5 de maju 2013.

Referendum supra sa zustissia, itte prevedit sa refforma supra sa cale ant a votare sos italianos.

Su 22 e 23 martu sos italianos ant essere giammados a votare pro detzidere si cambiare carchi parte de sa Costituzione in sa parte de su funtzionamentu de sa magistradura.Supra s’ischeda elettorale bi at essere una dimanda meda cumplicada pro itte bi sunt solu sos numeros de sos articulos de sa Costituzione chi ant essere cambiados, chena ispiegare in manera simple cale sunt sas novidades chi si prevedint.

Su referendum no est pro problemas medas chistionados de sa zustissia italiana, comente sos protzessos longos meda o sa mancantzia de pessonale in sos tribbunales. Su votu si cuntzentrat imbetzes supra s’ordiminzassione de sa magistradura e supra sas regulas de su tribagliu de sos magistrados. Sa refforma prevedit tres cambiamentos printzipales e importantes.

Bidimolos. Su primu est s’ispitzigu intre zuighes e pubbricos ministeros. Oe bintrant in sa magistradura cun su mattessi cuncursu e faghent parte de su mattessi assentu. Cun sa refforma sos duos caminos diant essere divididos in manera deffinitiva. Segundu chie agguantat su cambiamentu custa divisione diat faghere divennere su zuighe prus indipendente in su mamentu in su cale devet dezidere si una pessona est innozente o affartada. Chie est contrariu, invetzes, pensat chi su sistema de oe affiantzet giai ecchilibriu e chi ispitzigare de su tottu  sos duos rolos potat creare difficultades novas.

Su segundu puntu est pro su Cunsizzu Superiore de sa Magistradura, s’organu chi si occupat de sas carrieras de sos magistrados. Sa refforma prevedid de lu ispitzigare in duos: unu dedicadu a sos zuighes e unu a sos pubbricos ministeros. Sos partetzipantes diant essere seperados cun d’unu sorteamentu e non prus cun d’una elessione. S’urtimu cambiamentu est pro su sistema chi dezidit pro sas penalidades a sos magistrados. Sa refforma prevedit sa creassione de unu organismu novu chi si diat occupare propriu solu de custos protzedimentos.

Cun su referendum sos tzittadinos ant deppere seperare si mantennere sas regulas de como o faghere custos cambios in su funtzionamentu de sa magistradura italiana. In sas urtimas chidas custas votassiones ant tentu azzesu su cunfruntu politicu e sas animas de sos partidos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22