Initziativa de grandu importàntzia de su comunu de sa biblioteca de Àrthana in collaboratzione cun su sistema bibliotecàriu de su Nord de s’Ogiastra e cun s’Oleaster Servìtzios Culturales Integrados de Tortolì – Arbatassa. Pro totu su mese de maju, difatis, in is locales de sa Biblioteca Comunale de Àrthana, ant a èssere organizadas medas dies dedicadas a sa letura pro acostumare de prus a is pipios de s’iscola Primària e de s’Infàntzia a lèghere. S’at a cumentzare su 6 de maju a is 11 de mangianu cun sa presentatzione e cun sa letura de ttres libros pro pipios: “Papirofobia”, “Le confessioni di un gatto Killer” e “Pidocchi”. Giòbia 9 de maju a is 10.30, a incuru de s’Assòtziu Libriforas, at a èssere lèghidu su libru “La valigia delle filastrocche”, pro crios dae 3 a 4 annos, cun rèplica martis 14 de maju semper a is 10.30 pro is pipios dae 4 e mesu a 6 annos. Lunis 20 de maju, a is 9.30, ddoe at a èssere sa presentada de su libru “Quando avevo paura del buio”, a posta pro pipios dae 3  a 4 annos, mentres un’ora a pustis, at a èssere lèghida s’òpera “Chi semina raccoglie”, adatu a is pitzocheddos dae 4 annos e mesu a 6 annos. Ambas duas is òperas sunt curadas dae Francesco Moroni. S’ùrtima die de s’initziativa, lunis 27 de maju, dòpia letura de su libru “L’alfabeto delle emozioni” a incuru semper de s’iscritore Francesco Moroni. Prima letura a is 9.30 pro is pipios dae is 3 a is 4 annos de edade, e a is 10.30, sa de suas leturas pro is pitzocheddos prus mannitos dae 4 e mesu a 6 annos. Is giorronadas de letura sunt abertas a totus, non petzi a is minores, ma finas a is prus mannos e màssimu a is babbos e a is mamas chi ant a bòlere partetzipare comente pùblicu a is vàrias leturas.

A s’iscoberta de su logu archeològicu prus bellu de Tortolie

Su logu archeològicu de S’Ortali ’e su Monti, postu in s’iscrocca de Tortolie, in Ozzastra, est unu de sos cumplessos preistòricos e protostòricos prus importantes e mènzus cunservados de sa Sardigna. Postu intre duos rilievos a pagos chilòmetros dae su mare, in sa carrela chi che leat a sa plaja de Orrì, su logu apparat unu viazzu raru in mesu a millènnios de istòria, arregande testimoniàntzias chi partint dae su Neolìticu e arribant a s’edade de su Brunzu.

Inoghe si podet ammirare una domus de janas chi benit dae su Neolìticu reghente, iscavada in sa roca e destinada a s’interru cumone, duos menhir abbarrados chi faghent pensare a s’antiga presentzia de un’alliniamentu megalìticu e unu tzìrculu de pedra de casi 12 metros de diàmetru, ligadu a ritos o pràticas de comunidade de s’edade de su Ramene.

De importu particulare est sa tumba de sos Zigantes, architetura funerària tipica de sa tziviltade nuràgica, cun unu passaditzu longu de interru, incornissadu dae s’esedra, chi contat sas usàntzias antigas ligadas a su cultu de sos mortos. Su coro de su cumplessu est però su nuraghe S’Ortali ’e su Monti, una istruttura manna de pedra fraigada forzis in su 1500 a.C., formada dae unu bastione tzentrale e dae unu bastione elliticu cun turres a costazzos, un’òpera chi testimonzat sas capatzidades de fraigu e organizatzione de sos nuràgicos.

In giru a su nuraghe s’istèndiant sa bidda e zuras de tribagliu diferentes, intre de sas cales bi fuint logos de manizu e mescamente, silos pro sa cunservatzione de sos tzereales, elementos chi mustrant s’importu de sa lauranza in sa vida de donzi die de sas comunidades de cussa edade. Bìsitare S’Ortali ’e su Monti cheret nàrrere a s’infùndere in d’una bista ancora intrea, in ue sa presentzia de s’òmine antigu faeddat cun sa natura a inghìriu e apparat unu cuadru claru de comente sas populatziones preistòricas isseberaiant e modellaiant sos logos in ue bìvere.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”