Apuntamentu importante meda chenàbura 3 de maju in su Teatru Tonio Dei de Lanusè. A is 8.30 de merie a tardu ddoe at a èssere unu dòpiu eventu: sa cunferèntzia cuntzertu a tìtulu  “Sonos de Sinnos”, de su Tenore Ogiastra de Lanusè e de su istudiosu  durgalesu Andrea Deplano, chi at a presentare pro sa primu bia s’ùrtimu traballu suo. Su libru “Bidùstos”, èsitu de unu indagu aprofundida e interessante a pitzu de una de is prus importantes traditziones musicales chi tenimus nois in Sardigna, tuteladu e protègidu peri de s’Unesco comente patrimòniu de s’umanidade, no nche at mancu bisòngiu de ddu nàrrere, su cantu a Tenore Canto a Tenore. S’òpera de Deplano analizat in is pinnigas profundas de s’orìgine de custa espressione musicale, una de is prus caraterìsticas e particulares de s’ìsula nostra, aberende persursos e resonos noos de grandu importu. Fundamentale at a èssere peri, in mesu a sa cunferèntzia, s’esibitzione de su Tenore Ogiastra de Lanusè, chi de sa metade de is annos 80 portat a in antis cun passione e impignu sa traditzione de su cantu a tenore in Ogiastra comente sinnu de identidade. Is cumponentes de su tenore de Lanusè sunt:   Giorgio Usai (solista e mesu boghe), Matteo Deiana (solista e mesu boghe), Fabrizio Loddo (contra) e Stefano Carta (bàssu). Sa manifestatzione tenet su  patrotzìniu de su Comunu de Lanusè e de sa Provìntzia de s’Ogiastra. S’intrada est de badas. Pro chie tenet bisòngiu de àteras informatziones podet mutire a su nùmeru 338 968 9668 e at a rispòndere Giorgio Usai, solista e mesu boghe de su cuncordu.

Totu s’Itàlia in piatza po sa Palestina: medas abberu cussos chi ant manifestadu in totue. Solu in Casteddu fuint 15 miza.

In custas ùrtimas dies in Itàlia b’at istadu manifestatziones e isciòperos meda po sa Palestina. In tzitades meda sa zente est andada a manifestare cun su finis de chèrrere s’agabbu de sas mortes in Gaza, ube bi morit zente de donzi edade, mescamente pitzinnos de naschidorzu, e su riconnoschimentu de sa natzione de sa Palestina. Su 22 de capidanni de ocannu est istada una die de importu mannu: in Itàlia b’at istadu pius de 75 manifestatziones in aterentantas biddas e tzitades. Sa zente a ziru po custa cosa fuit meda: si narat chi esserant 100.000 persones.

De totu sas tzitades, tocat de montovare a Milano, Venètzia, Torino, Bologna e Roma, inube sos istudiantes e sos troballiantes ant prenadu piatzas e carrelas, zughinde in manos sa bandela de sa Palestina e cussa de sa paghe, fata de sos colores de s’arcu de chelu. In Sardigna sa manifestatzione pius manna l’ant fata in Casteddu, ube b’aiat 15.000 persones. B’at istadu zente meda puru in Terranoa, in Nùgoro, in Tàtari e fintzas in Aristanis.

Custas manifestatziones ant dadu abolotos e problemas puru, mescamente in sas corrieras e in sos trenos, ma puru in sas iscolas, chi fuint serradas. In portos meda, comente in Gènova e in Livorno, b’at istadu carchi malumore, ca triballiantes meda non b’ant triballiadu. Su peus est sutzessu in Milano e in Roma, inube carchi macu at imboladu fumògenos e àteros trastes, cun su finis de fàghere burdellu. B’at de nàrrere, però, chi su pius de sas tzitades at manifestadu in paghe e cuncòrdia, rispetande sa leze e pedinde a boghe arta e cun seru mannu chi custa gherra in Gaza potat finire e chi siat riconnota dae totus sa natzione de Palestina.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22