Est ponende camba finas in Ogiastra sa “Màrtzia de sa Terra”, sa mobilitatzione simbòlica e patzìfica promòvida dae ProgRes contra a su “Progetu Eleonora”, su pianu de chirca pro idrocarburos aprovadu dae sa Regione Sardigna a sa sotziedade Saras in un’àera de 44.300 ètaros in intro de sa Provìntzia de s’Ogiastra a presu de Arborea. Gosi comente aiat fatu Gandhi, chi 83 annos faghet doneit s’inghitzu a sa“Màrtzia de su Sale, ghiende mìgias de indianos cun unu pùngiu de sale a peròmine, pro protestare contra a sa dèguma pro su sale betada dae su guvernu inglesu, finas sa “Màrtzia de sa Terra est unu cumbidu a totus is sardos volenterosos a s’atopare totu cantos in Arborea, ognunu cun unu pùngiu de terra pro la dare in istrina a Eleonora. Custa mòvida at a serbire pro rivendicare su deretu de is sardos a detzìdere issos etotu de sa terra e de is risursas issoro, ma prus che totu de sa vida e de sa salude issoro. Pro leare parte a s’initziativa bastat a chircare su link http://marciadellaterra.progeturepublica.net/, marcare nùmene, sambenadu e bidda de poverèntzia, a manera de èssere registrados in deretura in sa mapa virtuale.

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”