At a cumentzare tra unas dies in Elini su “Laboratorio espressivo di ceramica”, unu progetu finantziadu dae sa Comuna e indiritzadu a is istudiantes de s’Iscola Elementare, chi tenet s’iscopu de afortiare e istimulare sas capatzidades espressivas de is pitzinnos. Pro is dischentes de sa prima classe su laboratòriu at a serbire a fraigare òperas chi ant a tènnere comente tema sa Pasca Manna e sa Festa de sa Mama, mentras is dischentes de sa segunda e de sa classe de sa de tres ant a fàghere is caratzas tìpicas de su carrasegare sardu. Pro is pipios de sa de bator e de sa de chimbe classes , imbetzes, sa faina at a èssere prus difìtzile, difatis, gràtzias a s’agiudu de sa iscritora Giovanna Mulas, ant a fàghere ogetos chi s’ant a ispirare a poesias iscritas dae is pipios etotu. Gràtzias a custu progetu is iscolanos ant a imparare is tècnicas fundamentales pro traballare sa tzeràmica e in su matessi tempus ant a passare oras de ispàssiu a cuntatu cun unu materiale naturale che a s’arghidda

Referendum supra sa zustissia, itte prevedit sa refforma supra sa cale ant a votare sos italianos.

Su 22 e 23 martu sos italianos ant essere giammados a votare pro detzidere si cambiare carchi parte de sa Costituzione in sa parte de su funtzionamentu de sa magistradura.Supra s’ischeda elettorale bi at essere una dimanda meda cumplicada pro itte bi sunt solu sos numeros de sos articulos de sa Costituzione chi ant essere cambiados, chena ispiegare in manera simple cale sunt sas novidades chi si prevedint.

Su referendum no est pro problemas medas chistionados de sa zustissia italiana, comente sos protzessos longos meda o sa mancantzia de pessonale in sos tribbunales. Su votu si cuntzentrat imbetzes supra s’ordiminzassione de sa magistradura e supra sas regulas de su tribagliu de sos magistrados. Sa refforma prevedit tres cambiamentos printzipales e importantes.

Bidimolos. Su primu est s’ispitzigu intre zuighes e pubbricos ministeros. Oe bintrant in sa magistradura cun su mattessi cuncursu e faghent parte de su mattessi assentu. Cun sa refforma sos duos caminos diant essere divididos in manera deffinitiva. Segundu chie agguantat su cambiamentu custa divisione diat faghere divennere su zuighe prus indipendente in su mamentu in su cale devet dezidere si una pessona est innozente o affartada. Chie est contrariu, invetzes, pensat chi su sistema de oe affiantzet giai ecchilibriu e chi ispitzigare de su tottu  sos duos rolos potat creare difficultades novas.

Su segundu puntu est pro su Cunsizzu Superiore de sa Magistradura, s’organu chi si occupat de sas carrieras de sos magistrados. Sa refforma prevedid de lu ispitzigare in duos: unu dedicadu a sos zuighes e unu a sos pubbricos ministeros. Sos partetzipantes diant essere seperados cun d’unu sorteamentu e non prus cun d’una elessione. S’urtimu cambiamentu est pro su sistema chi dezidit pro sas penalidades a sos magistrados. Sa refforma prevedit sa creassione de unu organismu novu chi si diat occupare propriu solu de custos protzedimentos.

Cun su referendum sos tzittadinos ant deppere seperare si mantennere sas regulas de como o faghere custos cambios in su funtzionamentu de sa magistradura italiana. In sas urtimas chidas custas votassiones ant tentu azzesu su cunfruntu politicu e sas animas de sos partidos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22