Pro un’amministratzione comunale moderna e a su passu cun su tempus sa comunicatzione cun is tzitadinos suos no est petzi un’òbligu, ma finas un’esigèntzia! Su mèdiu prus impitadu dae is entes comunales est sena duda su giassu internet, pro more de sa lestresa e de sa fatzilidade a ddu fàghere, ma prus che totu pro more de sa normativa in vigèntzia chi òbligat a is comunas de tènnere unu situ internet ufitziale pro fatzilitare is raportos cun is tzitadinos. Medas comunas ant peri aparitzadu un’ufìtziu informativu comunale pro agiornare a sa populatzione de totu is initziativas cun comunicados, avisos e bulletinos. Ma però, in is ùrtimos tempos, unas amministratziones comunales ant cumentzadu peri a frunire a sa tzitadinàntzias giornales pro mèdiu de sa retza o periòdicos in paperi pro more de tènnere unu raportu prus diretu cun sa gente. In Ogiastra a impreare custa forma de comunicatzione sunt Baunei cun su periòdicu “Comunità”, Gàiru cun su “Giornalino”, Biddamanna Strisàili cun “Biddas”, ma finas àteras comunas ogiastrinas sunt chirchende de fàghere sa matessi cosa. Su fine de custos giornales est cussu de megiorare s’oferta comunicativa intre is amministratziones e sa populatzione, ma peri cussu de cumpletare is tretos lassados bòidos dae is testadas giornalìsticas regionales traditzionales chi de sòlitu donant prus cura a is noas de caràtere generale e prus pagu a cussas de àmbitu locale. Duncas, est unu bene chi nche siat una pluralidade manna in s’informatzione, bastis chi si fatzat segundu un’ètica giornalìstica pretzisa, pro ite su passu dae s’informatzione a sa propaganda polìtica est piticu meda!

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22