Addòbiu de sa Federatzione Ogiastrina de su Partidu Sardu eris sero in sa sea tortoliesa de sa Provìntzia Ogiastra. Ùnicu puntu de sa dibata s’anàlisi de su votu essidu a campu dae is eletziones polìticas 2013. At abertu su chistionu Mario Demontis, Segretariu de sa Federatzione ogiastrina de is Bator Moros, su cale at donadu a bìdere comente su partidu apat poderadu meda a livellu natzionale e comente a livellu ogiastrinu apat crèschidu is votos.

“Podimus nàrrere cun seguresa- at naradu Deplano- chi sa pèrdida de votos chi ddoe at tentu in àteros logos de sa Sardigna, penso a Casteddu e a Tàtari, siat istadu cumpensadu dae s’aumentu de is cunsensos chi amus tentu nois in Ogiastra, in ue sa pertzentuale est istada de su 3,2% contra a su 1,7% de su 2008”.

Positiva finas s’anàlisi de su Cussigeri Provintziale Giuseppe Mesina, candidadu pro sa Càmera de is Deputados: “Non nego chi nois puru amus tentu dannu meda dae s’unda de Grillo, mancari gasi su Psd’Az est istadu unu de is pagos partidos istòricos chi at crèschidu is preferèntzias. Is datos sunt craros e netos: amus tentu unu aumentu de su 1,5% cunforma a is eletziones polìticas de su 2008 . in prus, e ddu naro cun orgòlliu, in sa bidda mia, Orthullè, s’est registrada sa pertzentuale prus manna de votos sardistas de totu sa Sardigna: 28% a sa Càmera e 22% a su Senadu!”.

Is membros de sa diretzione ogiastrina at donadu is bàntidos a su Segretàriu Deplano, narende·ddi de sighire in custu caminu, ma de chircare, pro regionales, de fàghere a manera chi su partidu siat prus abertu fache a foras e prus atentu a sa comunicatzione”.

Una parte de sa dibata est istada dedicada a sa detzisione de su Segretàriu Natzionale Giovanni Colli de si nche essire dae sa majoria de su guvernu regionale. Sa detzisione, mancari su sustegnu e sa fide in s’atzione de su segretàriu, at fatu nàschere calicuna duda tra is membros de sa diretzione ogiastrina de su partidu.

Referendum supra sa zustissia, itte prevedit sa refforma supra sa cale ant a votare sos italianos.

Su 22 e 23 martu sos italianos ant essere giammados a votare pro detzidere si cambiare carchi parte de sa Costituzione in sa parte de su funtzionamentu de sa magistradura.Supra s’ischeda elettorale bi at essere una dimanda meda cumplicada pro itte bi sunt solu sos numeros de sos articulos de sa Costituzione chi ant essere cambiados, chena ispiegare in manera simple cale sunt sas novidades chi si prevedint.

Su referendum no est pro problemas medas chistionados de sa zustissia italiana, comente sos protzessos longos meda o sa mancantzia de pessonale in sos tribbunales. Su votu si cuntzentrat imbetzes supra s’ordiminzassione de sa magistradura e supra sas regulas de su tribagliu de sos magistrados. Sa refforma prevedit tres cambiamentos printzipales e importantes.

Bidimolos. Su primu est s’ispitzigu intre zuighes e pubbricos ministeros. Oe bintrant in sa magistradura cun su mattessi cuncursu e faghent parte de su mattessi assentu. Cun sa refforma sos duos caminos diant essere divididos in manera deffinitiva. Segundu chie agguantat su cambiamentu custa divisione diat faghere divennere su zuighe prus indipendente in su mamentu in su cale devet dezidere si una pessona est innozente o affartada. Chie est contrariu, invetzes, pensat chi su sistema de oe affiantzet giai ecchilibriu e chi ispitzigare de su tottu  sos duos rolos potat creare difficultades novas.

Su segundu puntu est pro su Cunsizzu Superiore de sa Magistradura, s’organu chi si occupat de sas carrieras de sos magistrados. Sa refforma prevedid de lu ispitzigare in duos: unu dedicadu a sos zuighes e unu a sos pubbricos ministeros. Sos partetzipantes diant essere seperados cun d’unu sorteamentu e non prus cun d’una elessione. S’urtimu cambiamentu est pro su sistema chi dezidit pro sas penalidades a sos magistrados. Sa refforma prevedit sa creassione de unu organismu novu chi si diat occupare propriu solu de custos protzedimentos.

Cun su referendum sos tzittadinos ant deppere seperare si mantennere sas regulas de como o faghere custos cambios in su funtzionamentu de sa magistradura italiana. In sas urtimas chidas custas votassiones ant tentu azzesu su cunfruntu politicu e sas animas de sos partidos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22