Patrizia Frau: s’organizadora de isposòngios ogiastrina
Una conca de pilos totu aneddados, unu risu chi ammajat e una grandu atza. Acò su retratu de Patrizia Frau, bintinoe annos, tortoliesa chi dae su traballu de presentadore  radiofònicu est passada a organizare eventos. Prus che totu Patrizia in sa vida sua diat a bòlere aparitzare cojas. Faghimus una resonada cun issa.

Comente t’est bènnida s’idea de ti dedicare a organizare isposòngios?

Totu est nàschidu dae su disìgiu de fàghere unu traballadu adatu a mie chi mi daret sa possibilidade de pòdere espressare totu sa creatividade mia. Creo de aere semper àpidu unu predisponimentu naturale pro s’organizatzione e sa pianificatzione in gènere. In custa manera, cando custu taballu at cumentzadu a leare fama finas in Itàlia, apo detzisu de fàghere a manera sèria  frecuentende in Milanu unu cursu professionale pro organizare eventos e cojas, in inglesu Wedding and Event.

Ite as imparadu durante custu perìodu milanesu?

Durante is letziones apo imparadu is mètodos organizativos e is notziones subra is decoros. In prus apo atopadu  totu is professionistas de su setore chi girant a inghìriu de custu mundu, comente  is espertos de decoratziones floreales, is fotògrafos, is musitzistas e is istilistas. In Milanu apo tentu finas sa possibilidade de pònnere in pràtica su chi aia imparadu, leende parte a s’organizatzione de un’eventu in su palàtziu istòricu chi aparteniat a Alessandro Manzoni. Un’esperièntzia ùnica a beru!

Ite ambiente as agatadu in Ogiastra pro su traballu cosa tua?

In Sardigna su de organizare is cojas est unu traballu chi benit galu pompiadu cun unu pagu de  sùdditu e discunfiàntzia. Forsis pro ite est galu arraighinada s’idea de sa coja traditzionale, aparitzada dae sa famìllia de is isposos. Ma depo nàrrere chi in is ùrtimos tempos, de ogna manera, is isposas paret chi siant prus cumbintas, massimamente is chi cherent unu isposòriu ùnicu e fatu a mesura issoro. So faghende·mi connòschere a bellu a bellu e is satisfatziones sunt arribende!

Duncas su traballu tuo est creschende?

Emmo. Su còmpitu miu est cussu de fàghere a manera chi chie si cheret cojuare non si leet pensamentu. Is cosas chi tocat a acumprire pro una coja sunt una surra. In prus a tènnere una consulèntzia comente a sa mia bolet nàrrere a fàghere unu isposòriu ispetziale meda. Deo m’impigno in ogna ghetu pro fàghere a manera chi cussa die non s’ismèntighet ma chi originale chi abarret pro semper in sa mente de is isposos.

Comente t’immàginas sa die chi t’as a cojuare?

Sa coja mia devet èssere curada in ogna particulare e isco giai chi m’apa a ispassiare meda a ddu organizare, donende isfogu a totu sa fantasia mia. M’at a assimigiare: at a èssere traditzionale ma a tretos originale. Foras de custu, sa cosa prus de importu pro a mie at a èssere cussu de bìvere in fines cun su cumpàngiu de sa vida mia e festende paris cun is amigos, is parentes e cun totu cussos chi m’istimant

.
Ite cussìgias pro is isposas chi si devent cojuare?

Su consìgiu miu est cussu de chircare de non si fàghere leare dae is pensamentos. Est a non lòmpere ismòrridas e istracas a sa die de sa coja: tocat a si gosare su momentu prus importante de sa vida a su mègius! Pro si nde leare dae subra totu is impignos e is imbestos, su consìgiu miu est….. de mi tzerriare!!!!!

Casteddu, comintzat su Cossizu Metropolitànu nou: 70 comunes unidos po una comunidade cumpartida.

Su 16 de santuaini, in s’aposentu consiliare de su Palatu Règiu in Casteddu, est istadu fatu s’atopu de insediamentu de su Cossizu Metropolitanu nou, a pustis de sas eletziones chi bi sunt istadas su 29 de su mese coladu. Cust’atopu est su comintzu uffitziale de su mandadu amministrativu nou, a inube sunt andados sos rapresentantes elèzidos dae totu sos logos chi sunt parte de sa Tzitade Metropolitana de Casteddu.

S’atopu est comintzadu cun sas paràulas de su sìndigu metropolitanu Màssimu Zedda, chi at dadu su ben’ènnidos a totus. Posca at dadu a totu sos cossizeris noos carchi cossizu de comente fàghere po su tempus bennidore. Zedda at nadu chi sa punna pius manna de s’imbeniente siat cussa de fàghere una comunidade unida meda e capatze a valorizare sas cosas bellas chi in totu sas biddas bi sunt.

Custa est una de sas cosas chi pius tocat de fàghere, gai de àere mezoros mannos po totu sas biddas, chi sunt 70. Zedda lis at nadu puru chi tocat de afortire s’idea de apartenèntzia a su logu insoro, chi est semper mudande dae oe a cras. E custu tocat de lu fàghere chistionandesi pari- pari e cun sabiore meda. At nadu fintzas chi su Cossizu Metropolitanu est de importu mannu po dare su pesu zustu a totu sas biddas, gai de pòdere crèschere totus in donzi setore.

Su sìndigu at nadu chi tocat de ispalatare sas origas, iscurtande sas dudas e sas lementas de totus, gai de sas biddas mannas e gai e-totu de sas minores. Custu s’at a pòdere fàghere si b’at àere azudu dae parte de sos ufìtzios tènnicos e de chie tribàlliat in su Cossizu Metropolitanu, gai de bi tènnere un’andàina semper bia de novas, de ideas e de proponimentos.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22