Totus dd’ischimus: pro more de s’annùntziu de su Ministèriu de sa Sanidade chi òbligat sa serrada de totu is repartos chi non lompent a su mancu a 500 nàschidas a s’annu, su repartu de ostetrìcia de  s’ispidale de Lanusè arriscat de èssere serradu. Difatis medas mamas ogiastrina, sèberant de andare a fàghere partu a Nùgoro o a Casteddu. In custa situatzione mala de duda e de intzertesa, sa Asl nùmeru 4 at detzìdidu de no abarrare cun is bratzos in rughe ma de fàghere calicuna cosa pro megiorare e afortiare is servìtzios in favore de is mamas chi sèberant de fàghere nàschere is fìgios issoro in s’ispidale de Lanusè. Si totu andat segundu is pianos, tra su 2013 e su 2015, in su Repartu de ostretìcia ddoe ant a èssere unu muntone de novidades, gràtzias a atretzaduras de ùrtima generatzione chi ant a fàghere a manera chi is fèminas in càrrigu agenu potzant partorire cun comodidade, sena imbestu e  cun prus pagos tràumas. Is partorgianas, difatis, ant a pòdere fàghere nàschere is crios issoro a camba o in sa dòtzia a idromassàgiu, in un’ambiente sulenu e cun totu is cunfortos. Comente at naradu Francesco Pintus, diretore generale de sa Asl 4 “Su percursu maternidade est una de is punnas printzipales postas a su primu puntu de su documentu programmàticu de s’Azienda pro su triènniu 2013 – 2015, paris cun su servìtziu de “partu sena dolos” e su afortigamentu de s’assistèntzia a is panas”. In pagos faeddos, a bisu de sa Asl de Lanusè , s’aumentu e su megioru de s’oferta at a portare a una crèschida de is nàschidas in s’ispidale ogistrinu. Is ideas sunt bonas e de balore, ma podet èssere chi su caminu siat galu longu: s’ùrtima paràula dda tenet s’Assessore regionale a sa Sanidade Simona De Francisci. “Sa chistione de sa s’ sa organizatzione  noa de is puntos de naschimentu   at a èssere unu de is temas de sa cunferèntzia Istadu-Regione, at ispiegadu s’Assessore- Bos ammento chi su lìmite postu dae su Ministèriu de sa Salude est de milli partos a s’annu, e non 500. Su lìmite mìnimu de 500 nàschidas est ammìtidu francu in presèntzia de cunditziones particulares e de discumbènios graves .”

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22