Papari est sa cosa prus naturale chi faghimus ma, parafrasende a Wendell Berry, su massau poeta de su Kentucky, custa atzione simple est finas un’atu polìticu, pro ite is issèberos alimentares nostros tenent unas cunsighèntzias mannas in su territòriu, in sa cultura e in s’economia de ue bivimus. De totu custu s’at a chistionare sàbadu 16 de freàrgiu a is 6 de merie in sa Biblioteca Comunale de Irbono durante s’adòbiu de formatzione aparitzadu dae su partidu polìticu ProgRes chi at a tènnere comente tema pròpiu sa soberania alimentare, sa filiera curtza, sa territorialidade de is mensas e su favoressimentu de sa  costitutzione de una tropa locale de consumidores. Su tìtulu de sa reunione, “Papa e citu”, una boda chi si narat brullende pro nàrrere a unu chi devet papare sena si chesciare, a s’imbesse, serbit pro nos fàghere cumprèndere chi est semper pretzisu a ischire su chi ddoe est in su pratu nostru, sa calidade de su màndigu, in ue e comente est istadu produidu. In s’atopu ant a relatare duos pràticos de s’argumentu, Bobore Bussa, massau de Nùgoro fundadore de sa sienda Massajos, su portaboghe de su Movimentu Decrescita Felice, chi ant a allegare de s’importu de s’impreu de is produtos de su logu in is mensas pùblicas e de cale siat su profetu de sa filiera curtza pro s’ammanniamentu de su mercadu locale. A s’acabu de s’atopu, a su cale ant a pòdere leare parte agricoltores, cummertzantes, ma peri consumidores e tzitadinos, ddoe at a èssere unu cùmbidu de autofinantziamentu. Acodide in medas!

S’archìviu de Màrio Faticoni divenit digitale e bi podent intrare totus.

S’archìviu de Màrio Faticoni, atore, regista e iscritore protagonista de sa cultura sarda, divenit como digitale e totus b’ant a pòdere intrare. Costòit pius de barant’annos de atividade teatrale e culturale de sa Sardigna. Est istadu irrichidu cun vìdeos, pìculos de ispatàculos e àteru materiale documentàriu, oferinde un’ogriada prena subra de s’istòria de su teatru de s’ìsula nostra dae sos annos Sessanta a oe.

Su sito web nou l’ant resu fruìbile a totus in sa matessi die chi issu at cumpridu sos annos, e ocannu nde faghet 88. Custa die est su 20 de
capidanni. Faticoni est unu de sos fundadores de su Teatru de Sardigna e at regortu in sos annos artìculos, fotografias, documentos e materiales de iscena in cantidade manna. Custu est su primu archìviu teatrale de totu sa Sardigna, chi su Ministèriu de sos Benes Culturales at riconnotu comente de importu mannu. Meda de totu cussu chi b’est in cust’archìviu est istadu donadu in su 2022 dae su Museo archeològicu natzionale de Casteddu. De sas cosas pius de importu, tocat de montovare, in sa banda de su giornalismu, un’intervista fata dae Faticoni a Costantinu Nivòla in Nova York.

Sos documentos de s’archìviu sunt istados campaniados dae Faticoni paris cun s’assistente sua Simona Loddo. Su portale, invetze, est istadu fatu dae s’istùdiu de Afredo Scrivani e regollet cosa meda, chi est de annos e annos de carriera. Faticoni, nàschidu in Verona, si nd’est bènnidu a istare a Sardigna, ube at regortu documentos meda. Custu sito web nos contat s’istòria de su teatru sardu, dae sos primos esperimentos de su Cut- Centro universitàriu teatrale in su 1959 fintzas a cando est nàschidu su Cit.

In s’archìviu b’at testos, regias, betadas de manu e distimonias de sas produssiones pius noas, cun una bisione bene fata de s’atividade artìstica de Faticoni e de su rolu tzivile, sotziale e polìticu chi at tentu su teatru sou in Sardigna.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22