Loceri sighit a puntare in su territòriu suo e mestamente subra is risorsas paesagìsticas e ambientale, bidas non solu segundu unu puntu de annotu turìsticu, ma peri comente un’istrumentu mannu de amparu e de valorizatzione de sa cultura de su logu. A pustis de s’itineràriu toponomàsticu, chi partende dae sa partza printzipale de sa bidda leat is bisitadores fatu de unu percursu prenu de microtopònimos rapresentativos de is logos prus bellos de su territòriu loceresu, s’amministratzione comunale tenet giai un’àtera punna: sa carta toponomàstica digitale. Su progetu, finantziadu cun is fundos provintziales de sa lege regionale n. 26 de su 1997, prevedit s’ischedaduda e sa regorta de is nùmenes de su sartu de sa bidda, bogados a campu dae is follos catastales antigos allogados in is archìvios de sa Comuna e sa trascritzione issoro segundu s’allega loceresa. Totu is topònimos ant a èssere averiguados e controllados gràtzias a s’agiudu de is betzos de sa bidda e ant a èssere iscritos finas segundu is règulas fonològicas internatzionales, a manera chi peri chie non cumprendet su sardu ddos potzat lèghere  sena peruna dificultade. S’initziativa tenet s’iscopu de amparare unu patrimòniu de informatziones e de connoscèntzias trasmitidas oralmente chi arriscat de èssere pèrdidu pro semper cun sa morte de is prus betzos de sa bidda chi sunt is possessores autènticos de sa connoschèntzia de su pòpulu. Una borta acabadu, su traballu at a èssere postu in lìnea in su situ ufitziale de sa Comuna de Loceri a manera chi totus ddu potzant bìere e consultare gratuitamente.

“Su Nenniri”, s’antigu connottu sardu chi abbisat sa Pasca.

Cun s’arribu de sa Pasca, in biddas meda de sa Sardigna torrat unu de sos connottos prus antigos e ammaghiantes de s’isula:”su Nenniri”. Si tratta de chimizones de ranu o atteros semenes creschidos a s’iscuru, chi affigurant sa torrada a bida e s’isperantzia, ligados a sos ritos de sa Chida Santa. S’ammanitzu incuminzat parizzas dies prima de Pasca, sos semenes benint postos a brotare in bottos pitticcos, a s’ispissu prattos o canisteddos,cuzigados e attesu dae sa lughe. In custa manera creschent fines,craros e delicados, leande unu colore giallu chisinathu tipicu meda.

Sa forma insoro chidrina e s’aera casi de “sufferentzia” crischiant comente iscromba su sacriffitziu e sa morte de Cristus. In su mentres de sa Chida Santa,”is nenniris” che benint leados in cresia e impittados pro adornare sas tumbas, sos artares pro su Giovia Santu. In carchi bidda benint postos cun contivizu particulare impare a frores,qandelas e pannos, creande bistas simples ma prenas de signifficu.Est unu zestu chi aunit fede e connottu populare, chi andat dae ingendra a ingendra.

In comunidades meda, mescamente in sas biddas prus pitticcas, s’ammaniada de sos nenniri est fintzas unu mamentu de cundivisione.A s’ispissu sunt sas feminas e sos bezzos a si nde occupare, impare cun zovanos, chi gai imparant su balore de custos ritos antigos. Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.Cun su tempus, custos signifficos si sunt intritzados cun sa religione cristiana, dande vida a una cosa chi oe mustrat impare morte e torrada a bida.

“Su nenniri” non est solu unu elementu de decoradura, ma unu signu fungudu de sa cultura sarda. In d’unu mundu chi cambiat a sa lestra, custos connottos sighint a bivere gratzias a sa memoria de sas comunidades e a su disizu de no perdere sas raighinas insoro.Cun sa Pasca chi est accanta, cussos chimizones divennint gai unu nuntzu simple ma forte:pustis de donzi tempus buggiu, sa vida agatta semper sa manera de torrare a naschere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22