Is festas non finint mai pro sa Comuna de Seui, chi a pustis de sa festa de Su Prugadòriu at a sighire a regalare a is tzitadinos suos mùsica meda, ispàssiu e alligria. Dae su 2 a su 4 de onniasantu, difatis, sa Comuna de Seui e su Sòtziu Culturale “Su Prugadoriu”, at a acollire is bisitadores  in su tzentru istòricu de sa bidda pro sa manifestatzione intitulada SEUINmusica: tres dies dedicadas a su rìtmu, a sa cultura e a sa traditzione cun eventos e licònias locales, chenas e pràngios in andera, mustras de artisania in is mangasinos e tastos de su binu de su logu in is gazebos postos fatu de is camineddos de sa bidda e in s’istrada tzentrale. In programma unas passigiadas in su padente de Montarbu, sa presentada de s’òpera  “Orrosas in is manus” de Seconda Carta, sa presentada de su Progetu multimediale Gherradores e medas àteras cosas. Su cartellone est prenu de acontessimentos e de eventos de ogna genia chi non faghet a si pèrdere!

Sa Grutta de sa Pipera de Casteddu, intre istoria e paristoria.

A pagos passos dae su tzentru de Casteddu, accanta a sa carrela chi che leat a su campusantu de Tuvixeddu, si agattat unu de sos monumentos pius ammaghiantes e prenos de misteru de sa tzittade:sa Grutta de sa Pipera. Est unu sepurcu romanu iscavadu in sa rocca, de su I° seculu d.C., divennidu tzelebre no solu po sa bellesa architettonica sua ma fintzas po sa paristoria chi lu inghiriat.

Sa tumba fuit bistada fatta fraigare dae Lucio Cassio Filippo, nobile romanu chi arribaiat dae Cartagine, po sa muzzere Atilia Pomptilla, morta in Casteddu in su mentres de su disterru de su maridu. Sas iscrissiones intro de su sepurcu contant un’istoria de amore e devossione: secundu su connottu, Pomptilla diat aere donadu sa vida sua a sos deus po sarbare cussa de su maridu, chi si fuit ismalaidadu in su mentres chi fuit in Sardigna. Ma su chi rendet sa Grutta ancora pius enimmatica est sa presentzia, isculpida in sa fatzada, de duos terpentes imboligados.

Dae inoghe naschet su nomene “Grutta de sa Pipera”. In su tempus, a inghiriu de cussas friguras sun bennidos a pizu paritzos contos populares. Bi est chie at interpretadu sos terpentes comente conas de eternidade e protessione de s’anima de sos mortos, atteros bi ant bidu unu zubilu a sos cultos de s’antiga Roma o unu signu magicu capatze de che istesiare sos ispiritos malos.

Oe sa Grutta de sa Pipera est unu de sos logos archeologicos pius bisitados de Casteddu e sighit a esercitare un’ammaju forte supra sos bisitadores. S’aera sua suspesa intre contu e istoria, s’amore eternu chi ligat Pomptilla e Lucio Cassio Filippo e s’aria de misteru de duos terpentes isculpidos in sa pedra faghent de custu logu una cona de sa tzittade, capatze de contare no solu unu picculu de s’istoria romana sua ma fintzas sa fortza chi non morit de sas paristorias chi resistint a su tempus.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22