S’assòtziu culturale Anfiteatro Sud, ghiada dae Susanna Mameli e ativu in su territòriu dae prus de deghe annos, isbarcat pro chimbe annos de fila de pare in Ogiastra cun sa rassigna dedicada a is prus piticos intitulada “Arrivano i nostri” (Arribant is nostros). Is ispetàculos pro pipios ant a èssere presentados in sete biddas de sa provìntzia nostra (Lotzorai, Irbono, Tertenia, Ussassa, Osini, Ulassa e Talana) tra su 6 de onniasantu e su 21 de su mese de idas. S’Anfiteatro Sud at a presentare tres ispetàculos cosa sua comente  Chiniseri e Corraga (Cenerentolo e Corraga), Pinòchiu e is balentones (Pinocchio e i bulli), Cuguteddu ruju blues (Cappuccetto rosso blues) e Su giru de su mundu in 80 dies (Il giro del mondo in 80 giorni), mentres is àteros ispetàculos sunt su resurtadu de su traballu de àteros assòtzios sardos e italianos. Custu est un’adòbiu isetadu dae is prus giòvanos e mestamente dae is iscolas, chi in is annos colados ant pòdidu leare su sabore de sa creatividade e de sa fintzione iscenogràfica finas leande parte a su cuncursu fortunosu intituladu Su teatru fatu dae is pitzocos (Il teatro ragazzi fatto dai ragazzi).

Portale digitale novu in Nugoro pro mezorare s’impittu de sas meighinas.

Unu sistema digitale novu pro conduire menzus sas meighinas e mezorare sa calidade de sas curas gratzias a un’impittu prus attentu de sos datos. Est custu s’intentu de Duttore Digitale, unu portale creadu pro rendere prus fatzile sa tramuda de informatziones intre dittas sanidarias e duttores e pro minimare sos isperdissios in s’ispesa de sas meighinas.

Sa base permittit de controllare e registrare sas retzettas de sos duttores recoglinde e esaminande sos datos supra de sas meighinas.In custa manera donzi duttore podet biere in manera simple e azzorronada comente faghet sas retzettas e cunfrontare sos datos suos cun cussos de s’Asl. Su disignu est bistadu presentadu in Nugoro in su mentres de unu addobiu ordiminzadu dae s’Asl n.3 imparis a sas zuras sotzio sanidarias. Ant partetzipadu duttores de base, de sos pitzinnos e proffessioneris de sos ambulatorios de s’iscrocca.

Su portale permittit a sos duttores de controllare s’attividade insoro dae su puntu de bista de sos costos e de sas cantidades faghinde sas retzettas cun prus attentzione e bidinde si bi sunt errores o cosas chi no andant bene. Intre sas funtziones printzipales bi sunt bilancios personalizzados e sinnos automaticos chi azzuant a cumprendere si bi sunt differentzias in cunfruntu a sos istandard prevedidos, mezorande su controllu de sas retzettas.

Custu sistema est unu primu passu assa parte de un’impittu prus zustu de sas meighinas cun vantazos siada pro sos malaidos chi podent rezire curas menzus, siada pro su sistema sanidariu chi podet minimare sos affianzos chi si podent evitare e impittare menzus sas disponibilidades. Su portale at azzuare fintzas S’Asl a connoschere in presse meda sos problemas in sas retzettas e intervennere in manera lestra pro garantire un’impittu prus siguru e balidu de sas meighinas.

In afficcu istrumentos comente custos podent dare unu contribbudu a rendere sa sanidade semper prus moderna e accanta a sos bisonzos de sos tzittadinos. S’impittu de sos datos, difattis,permittit de leare detzisiones prus scientes e mezorare s’ordiminzassione de sos servitzios e accottare su tribagliu de sos duttores in su controllu de sos malaidos mescamente in sos casos prus cumplicados. Sa digitalizzassione si cunfirmat gai una leva de fundamentu pro fraigare unu sistema sanidariu prus balidu, agguantabile e capatze de apparare curas de calidade a tottus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22