Biddamanna aberit is ghennas de sa Fiera de sa Produtividade e ddu faghet in paris a sa Comuna de Talana e a su grandu musitzista nugoresu Gavinu Murgia. In s’àmbitu de su progetu  “Acqua Vi.Ta”, Murgia at tènnere unu cuntzertu in su tzentru fierìsticu de “Su Bìviu” chenàbura 14 de cabudanni a incumentzare dae is 21.30. S’ispetàculu est nàschidu pròpiu dae s’idea de contare, in manera originale e poètica, s’abba comente bene primàriu chi depet èssere sarbadu e tuteladu cun totu in fortzas dae totus. Pro ite su problema tocat cada tzitadinu de su mundu, sena peruna diferèntzia. In su palcu, in paris cun Gavinu Murgia, ddoe ant a èssere àteros artistas famados comente Marcello Peghin, Salvatore Maltana, Alessandro Garau, Antonello Mura, su tenore Gòine, Momak de is Menhir, Licio Esposito e Gianni Cossu. Su progetu “Acqua di Vi.Ta! (unu giogu de faeddos chi bolet nàrrere finas “abba de vida”) at a chircare, duncas, peri pro mèdiu de sa mùsica e de s’arte, de cumbìnchere a sa gente e a is indùstrias de impreare e a ispatzare prus pagu abba in butìllia, ispieghende a sa populatzione comente si podet impreare custa risursa in manera prus responsàbile e prus sàbia.

Sardigna urtima in Italia pro sos zovanos:pagas opportunidades e medas custrintos a partire.

Sa Sardigna est intre sas regiones italianas cun prus pagu
possibilidades pro sos zovanos chi cherent tribagliare o abberrere
un’attividade. A lu narrere est un’istudiu fattu dae s’Uffitziu Istudios
de Confartigianato chi esaminat sa situassione de sos zovanos in totta
s’Italia.
Sos numeros sunt craros e affuscant: sa Sardigna si agattat a s’urtimu
postu de sa classifica, cun d’unu punteggiu de 403, meda prus bassu in
cunfrontu a sa media natzionale . Su cunfrontu cun sas regiones prus
fortes si evidentziat ancora de prus.
Custu cheret narrere chi in s’isula bi sunt difficultades meda pro sos
zovanos, mescamente cando si faeddat de tribagliu e possibilidades de
fraigare unu tempus benidore. Intre sos problemas printzipales bi est su
numeru bassu de zovanos chi resessint a acciappare unu tribagliu firmu.
Medas addurant chena tribagliu o sunt custrintos a atzettare tribaglios
precarios o pagu siguros.
Un’atteru marghine importante est s’appitzigu intre iscola e tribagliu,
chi a s’ispissu non funtzionat comente diat deppere. Sos piccioccos, una
borta finidos sos istudios, si agattant chena unu collegamentu beru cun
su mundu de sas dittas e faghent fadiga a s’inficchire.
Tottu custu che leat a una cunseguentzia chi si biet dae annos meda:
medas zovanos seperant de dassare sa Sardigna. Bi est chi si movet in
atteras regiones italianas e chie detzidit de andare in forastigu, pro
chircare opportunidades prus mannas. Est unu seperu a s’ispissu
pretzisu, non disizadu, chi brivat s’iscrocca de arrancos, ideas e
cumpetentzias de fundamentu.
Sa Sardigna, duncas, est bida comente una terra chi fadigat a tennere
sos zovanos suos e a lis dare cunfiantza. Chena unu cambiu de ingendra e
chena dittas novas, fintzas s’accolomia locale arriscat de abbaccare
semper de prus.
Serbit unu cambiu cumpridu. Est netzessariu creare prus tribagliu,
affortigare su ligamene intre iscola e dittas e accomettare chie cheret
tribagliare pro contu sou. Sos zovanos non dimandant mandos, ma solu sa
possibilidade de si fraigare una bida cun dignidade in s’iscrocca
insoro.
Si custa cosa no at a cambiare, s’arriscu est cussu de biere una
Sardigna semper prus boida de zovanos e semper prus cridina dae su puntu
de bista accolomicu e sotziale. Donzi piccioccu chi partit est una
perdida non solu pro sa famiglia sua, ma pro totta sa comunidade.
Attività realizzata col contributo della Regione Sardegna — IMPRENTAS
2025-2026. LR 22/2018, art. 22