Traditzione, retziclu, aorru, incuru de s’ambiente e deghesa urbana: custos sunt is faeddos crae de sa Fiera de sa Produtividade Sustenìbile in programma su 14, 15 e 16 de cabudanni in Biddamanna Strisàili. Su piessignu de sa Fiera de ocannu, chi lompet a sa de tres editzione,  at a èssere sa cungiuntura tra s’arte e sa tecnologia. Is aziendas esposidoras, is mègius de su tzircùitu ogiastrinu in su setore de s’economia birde, de s’agrualimentare e de s’artisania, ant èssere prus de chimbanta. In intro de su tzentru fierìsticu at a èssere ospitadu finas su Salone de s’Innovatzione, unu tretu reservadu a s’espositzione de Sardigna Chircas chi at a pònnere in bella mustra is ùrtimas novidades produidas in Sardigna e is protòtipos de Futuridea, su sòtziu  molisanu chi faghet un’òpera de compudu de is brevetos e de is iscobertas tecnològicas a livellu natzionale e internatzionale. Peri s’arte e sa mùsica ant a acumpangiare is bisitadores durante cada die de abertura de sa Fiera: chenàbura ddoe at a èssere su cuntzertu jazz de Gavino Murgia, su 15 cussu de Dott. Drer & CRC Posse.

 In programma peri sa Mustra de arte Ogiastra, cun artistas chi ant a arribare dae totu sa Provìntzia, e su Gabinetto d’arte Menta, a incuru de unos artistas de Berlinu. Durante sa Fiera s’ant a fàghere finas unos cunvegnos chi ant a allegare de bioedilìtzia, de “biddas torradas a gendrare” e de Forestas Sustenìbiles. Is pitzinnos, in paris a is babbos e  a is mamas, s’ant a pòdere ispassiare gioghende in is laboratòrios de retziclu, in ue ant a assìstire a is creatziones de Manolo Benvenuti, s’architetu chi tratat sa bioarchitetura comente chi siat una forma de arte. Sa Fiera est aparitzada dae su GAL Ogiastra e dae sa Comuna de Biddamanna Strisàili.

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22