De meda e meda in Àrthana ddoe teniat unu pastore chi teniat unu tàgiu piticu de cabras. Fiat gosi pòberu chi pro pastura si podiat permìtere petzi unu crastilàrgiu a largu de sa bidda in ue creschiat pagu erba e chi fiat abitadu dae is Janas. Ogna note custas criaduras nde bessiant de is grutas e trubaiant e ispainaiant su bestiàmene e a de die, imbetzes, dd’assuidaiant e ddu disturbaiant mentras chi fiat paschende.  Tando su pastore at selladu de ddis donare unu pagu de su casu chi teniat in coile, in manera chi custos èsseres ddu lassarent in paghe, e gosi est andada. De sa die is Janas no ant prus infasciugadu is cabras. Totu est andadu bene finas a cando su cabràrgiu, orròschidu de èssere pòberu, est andadu in un’àteru coile, s’at furadu unu tàgiu de cabras e dd’at aunidu a is cabras suas. Dae tando però is Janas no ant prus agradèssidu su casu chi su pastore ddis donaiat e antzis, ant cumentzadu a infasciugare su bestiàmene comente faghiant in antis. Su pastore at pensadu ca sa cosa chi ddis regalaiat fiat pagu e chi is Janas si fiant avolotadas pro cussu. Sa die sighente tando ddis at donadu meda prus casu, ma cussas si sunt rabiadas meda de prus e ant initziadu a istriulare faghende fuire totu is animales dae sa propiedade. S’òmine a sa coa at cumpresu e cale fiat su problema e in deretura nche at torradu is cabras furadas a su mere issoro. De cussu momentu is Janas no iant prus disturbadu is crabas e, pro su brègiu de su pastore,  peri s’erba iat cumentzadu a fàghere de prus.

Contadu dae sa bonànima de Cìciu Maròngiu, òmine sàbiu e de valore de sa bidda de Àrthana.

---

© RIPRODUZIONE RISERVATA

Chircas in cursu in Sardigna pro Elia Del Grande, s’òmine chi in su 1998 at isterminadu sa famìlia in su Varesotu.

Sighint in Sardigna sas chircas de Elia Del Grande, s’òmine chi in su 1998 at bochidu su babbu, sa mamma e su frade in sa domo de famìlia a Cadrezzate, in sa provìntzia de Varese. A pustis de àere pagadu sa pena pro su mortorzu triplu, Del Grande fiat istranzu de sa presone de Castelfranco Emilia (Mòdena), in ue si nch’agataiat pro resones de seguresa e ca lu cunsideraiant ancora perigulosu pro sa sotziedade.

Segundu sa politzia s’òmine diat èssere lòmpidu a fuire calendesi dae su muru de tanca de s’istrutura penitenziària impreande una corda fatta cun filos elètricos. Dae sa notte de s’evasione, sas fortzas de s’òrdine ant cumintzadu una operatzione manna de chirca, allargada como fintzas in Sardigna, in ue si creet chi siat bennidu o tènzat cuntatos.

Su Dipartimentu de s’amministratzione penitenziària at dispostu una chirca interna pro ischirriare comente siat istadu possìbile chi unu presoneri cussideradu perigulosu siat lòmpidu a ischivare sa sorveglianza in una istrutura de seguresa mèdia. Elia Del Grande, oe de 49 annos, est devènnidu tristemente connotu pro cussa chi sos medios de comunicatzione ant torradu a narare s’istrage de sos forneris. Su 7 de bennàrzu de su 1998, a s’edade de 22 annos, at bochidu sos genitores suos e su frade mannu, cun su cale manizaiat una panificatzione de famìlia. A pustis de su delitu est fuidu in Isvìtzera, ma est istadu frimmadu pagas dies a pustis e at cunfessadu in presse su chi fit acontèssidu.

Cundennadu in Appellu a 30 annos de presone cun su reconnoschimentu de sa semi- infermitade mentale, Del Grande at passadu in presone 25 annos in antis de èssere tramudadu in d’una istrutura cun vigilàntzia iscainada. Sas fortzas de s’òrdine cussizant sa massima abbistesa e a sinnalare cale si siat possìbile abbistamentu s’obietivu est agatare su fuidu in su prus pagu tempu possìbile e accrarare sas circumstàntzias de s’evasione.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”