Pagas dies faghet est istadu abertu in Tortolì su primu Tzentru Antiviolèntzias de totu s’Ogiastra. At a èssere gestidu dae s’Assòtziu FiguraSfondo e finantziadu dae sa Provìntzia e dae s’Amministratzione Comunale de Tortolì, chi luego ant a donare a s’assòtziu una sea idònea e reservada pro acumprire totu is atividades suas. Su tzentru, chi si mutit “Mai prus violadas”, giai dae su nùmene faghet cumprèndere cale siat sa punna sua. Is voluntàrias de su tzentru, totas professionistas  de su campu sotziale e psicològicu, ant a donare de badas a totas is fèminas in dificultade una manu de agiudu e de cunfortu. In una situatzione in ue is abusos e sa violèntzias contra a is fèminas sunt semper aumentende, su tzentru at a chircare de fàghere unu traballu de informatzione, a tales chi nisciuna fèmina tèngiat prus timòria de denuntziare is angarias o is preputèntzias. Immoe bastu! Niuna si depet abarrare a sa muda! Is voluntàrias, chi podent èssere cuntatadas a su nùmeru 0782-620107, ant a retzire a totus in unu logu reservadu, in ue nemos giudicat (ma iscurtat ebbia) su martis e su chenàbura dae is 9.00 a is 12.00 e su gioja  dae is 15.30 a is 18.30. Duncas complimentos corales a custas professionistas pro s’initziativa issoro!

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22