Peri ocannu sa tzitadina de Jersu  s’at a torrare a abbivare cun sa traditzione, cun sa mùsica e cun su binu bonu. Difatis, sa costumada tastadura de su binu fatu fatu de is àndalas de sa bidda (lòmpida a sa de trinta editzione) at a abbivare ogiastrinos e turistas dae su 4 a su 10 de su mese de austu. In mesu mesu a su famadu  “Jerzu Wine Festival” , est a nàrrere “Sa Festa de su Binu de Jersu” ddoe ant a èssere unu muntone de manifestatziones cun isfiladas folclorìsticas, rapresentatziones teatrales, cuntzertos musicales e tastos de produtos tìpicos. Su protagonista prus de importu, però, at a èssere su Cannonau. Is acontessimentos chi non tocat a pèrdere ant a èssere duos: sa Sagra de su Binu, abbinada a sa nòdida isfilada de su 5 de austu de is bestires traditzionales sardos, e “Calighes de Isteddos” (Calici di Stelle), sa manifestatzione in andera chi prevedit su tastu de su binu de Jersu e de is produtos locales. Ocannu, a printzipiare dae su merie, ant a èssere cunsignadas prus de sesmìgia tassas. Cosa noa, ddoe at a èssere finas sa possibilidade de seberare tra duos percursos diversos, cussu ruju e cussu asulu. At a èssere custa un’istade de regordare, gràtzias peri a is nodas de sa Large Street Band, a is gioghilleris, a is Drag Queen e a àteros grupos musicales chi s’ant a esibire in cada tretu de sa tzitadina! Proibidu a ddoe mancare!

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22