In Baunei si respirat giai àrea de Guinness World Record. Dòminigu 8 de mese de argiolas, difatis, unu muntone de persones s’ant a adobiare in sa pranedda de su Golgo pro formare unu chìrcu mannu ballende su “ballu tundu”, pro more de arrenèschere a bìnchere su record mundiale in custu setore. Su Ballu Tundu naschit dae unos tzerimoniales de sa preistòria e rapresentat unu momentu de ispàssiu ma finas de unidade e de amigàntzia. Giangiacomo Pisu, unu de is organizadores, at naradu: “Custu eventu tenet s’iscopu de onorare sa terra nostra e de fàghere a ischire a totus chi nois semus aunidos e prontos pro unu tempus benidore mègius”.

Sa manifestatzione at a èssere dedicada a su cantautore sardu Andrea Parodi (chi bisaiat de bìdere una die is sardos aunidos totus in paris in intro de su chìrcu de su Ballu Tundu) e a totus cussos chi in Sardigna sunt in unu istadu malu, siat de salude, siat econòmicu. Custu est su programma iscritu a sa minuda pro chie si siat bolet leare parte a custa initziativa:

Domìniga 08 de argiolas 2012

09:30 – Lòmpida de is partetzipantes e registratzione in su registru chi at a èssere imbiadu a su Team del G.W.R. de Londra.

10:00 Proa de is istrumentos musicales.

10:15 Inìtziu de su ballu, documentadu cun fotos e filmados.

11:10 Cunsinna de sa targa-regorsu dedicada Andrea Parodi.

11:20 Intregu de is targas a su baddadore prus giòvanu, a su prus betzu, a cussos chi benit dae prus a largu e a su grupu prus mannu.

11:30  Ismùrgiu e bìsita in sa pranedda de su Golgo, in su nuraghe Coeserra As Piscinas, cun is altares e is tzìrculos megalìticos, in Su Sterru (s’ispèntuma a imbudu prus fungudu de s’Europa), in su màrghine de 10 metros de artària chi abbrontat a su Bacu de Dolcolce, a palas de sa pasada e de su ristorante, in su nuraghe de Genna de Sermentu e in su nuraghe de Orgoduri.

Referendum supra sa zustissia, itte prevedit sa refforma supra sa cale ant a votare sos italianos.

Su 22 e 23 martu sos italianos ant essere giammados a votare pro detzidere si cambiare carchi parte de sa Costituzione in sa parte de su funtzionamentu de sa magistradura.Supra s’ischeda elettorale bi at essere una dimanda meda cumplicada pro itte bi sunt solu sos numeros de sos articulos de sa Costituzione chi ant essere cambiados, chena ispiegare in manera simple cale sunt sas novidades chi si prevedint.

Su referendum no est pro problemas medas chistionados de sa zustissia italiana, comente sos protzessos longos meda o sa mancantzia de pessonale in sos tribbunales. Su votu si cuntzentrat imbetzes supra s’ordiminzassione de sa magistradura e supra sas regulas de su tribagliu de sos magistrados. Sa refforma prevedit tres cambiamentos printzipales e importantes.

Bidimolos. Su primu est s’ispitzigu intre zuighes e pubbricos ministeros. Oe bintrant in sa magistradura cun su mattessi cuncursu e faghent parte de su mattessi assentu. Cun sa refforma sos duos caminos diant essere divididos in manera deffinitiva. Segundu chie agguantat su cambiamentu custa divisione diat faghere divennere su zuighe prus indipendente in su mamentu in su cale devet dezidere si una pessona est innozente o affartada. Chie est contrariu, invetzes, pensat chi su sistema de oe affiantzet giai ecchilibriu e chi ispitzigare de su tottu  sos duos rolos potat creare difficultades novas.

Su segundu puntu est pro su Cunsizzu Superiore de sa Magistradura, s’organu chi si occupat de sas carrieras de sos magistrados. Sa refforma prevedid de lu ispitzigare in duos: unu dedicadu a sos zuighes e unu a sos pubbricos ministeros. Sos partetzipantes diant essere seperados cun d’unu sorteamentu e non prus cun d’una elessione. S’urtimu cambiamentu est pro su sistema chi dezidit pro sas penalidades a sos magistrados. Sa refforma prevedit sa creassione de unu organismu novu chi si diat occupare propriu solu de custos protzedimentos.

Cun su referendum sos tzittadinos ant deppere seperare si mantennere sas regulas de como o faghere custos cambios in su funtzionamentu de sa magistradura italiana. In sas urtimas chidas custas votassiones ant tentu azzesu su cunfruntu politicu e sas animas de sos partidos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22