Peri ocannu s’at a torrare a fàghere su torneu istadiale de Pallavolo de plàia, s’eventu prus isetadu de s’istade. Su campionadu, nàschidu dae s’initziativa de is amantiosos de custu isport chi cada istade prenent is campos a probe de mare, est diventadu un’adòbiu de grandu interessu pro professionistas e apassionados de  s’Ogiastra e finas de sa Barbàgia. Medas is iscuadras prontas a s’afrontare cada sero in su campu isportivu de Gelisuli, tra làgrimas e suore, regalende a is ispetadores ispàssiu e disaogu.

S’adòbiu isportivu, lòmpidu giai a sa de chimbe editzione, cheret cummemorare sa bonànima de  Fabio Pitzalis. Su torneu si displigat segundu sa fòrmula de su 4X4 mistu, e apenas incumentzadu faghet a bìdere is primos ispantos. Giai dae is primas iscutas su livellu si presentat giai artu gràtzias a sa partetzipatzione de unu muntone de veteranos acostagiados dae medas giovànos de bonas promissas. Custa cumpetitzione ogna sero at a regalare a is ispetadores oras de emotzione e de bonu isport, ma is mègius iscuadras ddas amus a pòdere bìdere petzi  tra su 9 e su 10, est a nàrrere in sa fase preliminare de su torneu, ocannu articulada in cunforma a sa modalidade clàssica de su girone a s’italiana. In sa prima fase de sa gara s’ant a afrontare duas iscuadras chi ant iscaladu sa classìfica in pagu tempus, sa “Turismar” de Luca Ammendola e Alessio Aresu e sa nuorese “Socrates” de Franco Filia, chi pròpiu eris sero si sunt afrontadas pro prima bia in su campu e nois de Vistanet amus cumpudadu sa partida in contu bostu. Custa sa crònaca:

Pagos faeddos a in antis de s’adòbiu, petzi cuntzentratzione e mudìmene. Ognunu ischet ca non podet fàghere faddina. Puntos fatos a sa renfrusa chi s’intrèvenant a ischiatzadas chi ispantant su pùblicu. Sa potèntzia fìsica de su foramanu de s’iscuadra de is “Socrates” faghet tìmere a totus, francu a su muru de sa “Turismar”,  ordinadu e eficatze, denneghende unu muntone de puntos a is aversàrios e faghende∙nde totalizare àteros pro issos etotu. E cando s’iscuadra s’agatat apretada, mescamente in sa serrada de su set, Ammendola est capassu de pigare a sa manu s’iscuadra e de leare a domo su resurtadu. Cando in fatu sa fortza non bastat prus tando is duas iscuadras incumentzant a giogare cun malìtzia, cun mòvias farsas e pallonetos: est tando chi initziat s’ispetàculu. Cun grandu acòrdiu tra s’artziadore e s’ischiatzadore de is “Socrates”, is nugoresos mustrant s’atza issoro e renessent a agatare is fortzas chi crediant de àere ispatzadu: su segundu set est s’issoro.  Immoe non si podet fàghere perunu isbàlliu e totus dd’ischent. Su suore calat a istidda a istidda, is mùsculos sunt istrirados finas su màssimu ma nemos intendet s’istrachesa pro ite niunu bolet pèrdere; pagos faeddos in s’ora de pasu de su time out, petzi isprenetu e atza meda. Tra is duas iscuadras immoe est gherra aberta. Pallonetos, bòtzas segadas e piatzadas e sa “Turismar” nche isciaddet in un’ibitu a is aversàrios. Sa lòmpida est indedda e ischent de dda pòdere aguantare. Cumandados dae Ammendola, is cumpàngios boddint unu puntu fatu a s’àteru e concruent sa partida leande∙si a domo duos puntos  chi ddis faghent balangiare su primu posti in sa classìfica.

Sa cuntentesa de is binchidores però no est meda. Difatis ischent chi su torneu est galu longu e chi in custu isport su resurtadu si podet furriare in deretura. Bos amus a ischire finas de is àteros adòbios.  Pro como sa classìfica est custa:

SCUADRA    PUNTOS

Turismar    15

Socrates    13

Serra Ceramiche    13

Frailis Animazione    12

Eureka    9

Marmock Beach    9

La Baia    7

Titanic    0

Falegnameria Pani    0

---

© RIPRODUZIONE RISERVATA

Capo d’Orso su zigante de granitu chi dominat sa Gaddura.

In su coro de sa Gaddura bidinde su mare crtistallinu de Palau, bi est una de sas meravizzas naturales pius conicas de sa Sardigna: Capo d’Orso.

Custa formatzione manna de granitu, assempiada in sos annos dae su bentu e dae s’abba chi proet, leat su nomene dae sa forma chi non si podet cunfundere e chi ammentat un’ursu chi andat a su mare. Postu a casi 120 metros supra su mare, Capo d’Orso offerrit una de sas bistas pius suggerentes de s’isula. Dae sa parte pius arta sa mirada biet tottu s’arcipelagu de sa Maddalena, cun sas isulas de Spargi, Budelli, Razzoli e Santa Maria finzas a sa Corsica chi est accantu e si biet in sa dies pius limpidas. Est unu logu chi aunit geologia, mitos e bistas, diveninde una frimada necessaria po chie bisitat sa Sardigna de su cabu de susu.

Sa rocca, chi faghet parte de unu complexu graniticu de su tempus de su Paleozoico, est su resurtadu de unu protzessu naturale de frazadura giammadu tafoni, chi at isculpidu su granitu in formas moddes e bratzanas. In su cursu de sos seculos sa frigura sua at ispiradu contos e paristorias: sos marineris chi surcaiant sas abbas de s’arcipelagu la reconoschiant comente puntu de relata cussiderandela unu baidanu mudu de sas costa gadduresa. Oe Capo d’Orso est unu de sos logos pius bisitados de sa zura.

Unu caminu approntadu ghiat sos bisitadores finztas a su puntu paronamigu affundadu in su tupone mediterraneu e olorosu de chessas, murta e ghiniperos. Sa zura est amministrada commente logu naturalisticu diffesu, cun caminos de bisita regulamentados po sarbare s’ecchilibriu de s’ambiente e garantire sa sicureza.

Accanta a su balore naturalisticu, Capo d’Orso est divvenidu una prenda de identidate po sa Gaddura e po sa Sardigna intrea. Est unu attobiu perfettu intre sa fortza de sa natura e sa poesia de sa bista, unu logu chi contat s’istoria geologica longa de s’isula.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”