Peri ocannu s’at a torrare a fàghere su torneu istadiale de Pallavolo de plàia, s’eventu prus isetadu de s’istade. Su campionadu, nàschidu dae s’initziativa de is amantiosos de custu isport chi cada istade prenent is campos a probe de mare, est diventadu un’adòbiu de grandu interessu pro professionistas e apassionados de  s’Ogiastra e finas de sa Barbàgia. Medas is iscuadras prontas a s’afrontare cada sero in su campu isportivu de Gelisuli, tra làgrimas e suore, regalende a is ispetadores ispàssiu e disaogu.

S’adòbiu isportivu, lòmpidu giai a sa de chimbe editzione, cheret cummemorare sa bonànima de  Fabio Pitzalis. Su torneu si displigat segundu sa fòrmula de su 4X4 mistu, e apenas incumentzadu faghet a bìdere is primos ispantos. Giai dae is primas iscutas su livellu si presentat giai artu gràtzias a sa partetzipatzione de unu muntone de veteranos acostagiados dae medas giovànos de bonas promissas. Custa cumpetitzione ogna sero at a regalare a is ispetadores oras de emotzione e de bonu isport, ma is mègius iscuadras ddas amus a pòdere bìdere petzi  tra su 9 e su 10, est a nàrrere in sa fase preliminare de su torneu, ocannu articulada in cunforma a sa modalidade clàssica de su girone a s’italiana. In sa prima fase de sa gara s’ant a afrontare duas iscuadras chi ant iscaladu sa classìfica in pagu tempus, sa “Turismar” de Luca Ammendola e Alessio Aresu e sa nuorese “Socrates” de Franco Filia, chi pròpiu eris sero si sunt afrontadas pro prima bia in su campu e nois de Vistanet amus cumpudadu sa partida in contu bostu. Custa sa crònaca:

Pagos faeddos a in antis de s’adòbiu, petzi cuntzentratzione e mudìmene. Ognunu ischet ca non podet fàghere faddina. Puntos fatos a sa renfrusa chi s’intrèvenant a ischiatzadas chi ispantant su pùblicu. Sa potèntzia fìsica de su foramanu de s’iscuadra de is “Socrates” faghet tìmere a totus, francu a su muru de sa “Turismar”,  ordinadu e eficatze, denneghende unu muntone de puntos a is aversàrios e faghende∙nde totalizare àteros pro issos etotu. E cando s’iscuadra s’agatat apretada, mescamente in sa serrada de su set, Ammendola est capassu de pigare a sa manu s’iscuadra e de leare a domo su resurtadu. Cando in fatu sa fortza non bastat prus tando is duas iscuadras incumentzant a giogare cun malìtzia, cun mòvias farsas e pallonetos: est tando chi initziat s’ispetàculu. Cun grandu acòrdiu tra s’artziadore e s’ischiatzadore de is “Socrates”, is nugoresos mustrant s’atza issoro e renessent a agatare is fortzas chi crediant de àere ispatzadu: su segundu set est s’issoro.  Immoe non si podet fàghere perunu isbàlliu e totus dd’ischent. Su suore calat a istidda a istidda, is mùsculos sunt istrirados finas su màssimu ma nemos intendet s’istrachesa pro ite niunu bolet pèrdere; pagos faeddos in s’ora de pasu de su time out, petzi isprenetu e atza meda. Tra is duas iscuadras immoe est gherra aberta. Pallonetos, bòtzas segadas e piatzadas e sa “Turismar” nche isciaddet in un’ibitu a is aversàrios. Sa lòmpida est indedda e ischent de dda pòdere aguantare. Cumandados dae Ammendola, is cumpàngios boddint unu puntu fatu a s’àteru e concruent sa partida leande∙si a domo duos puntos  chi ddis faghent balangiare su primu posti in sa classìfica.

Sa cuntentesa de is binchidores però no est meda. Difatis ischent chi su torneu est galu longu e chi in custu isport su resurtadu si podet furriare in deretura. Bos amus a ischire finas de is àteros adòbios.  Pro como sa classìfica est custa:

SCUADRA    PUNTOS

Turismar    15

Socrates    13

Serra Ceramiche    13

Frailis Animazione    12

Eureka    9

Marmock Beach    9

La Baia    7

Titanic    0

Falegnameria Pani    0

---

© RIPRODUZIONE RISERVATA

In s’ambiente carrigu de emossiones de sa parrocchia de Istella Maris, s’artista prenu de talentu naschidu in Tortulè Mario Lai, at in finis cussinnadu una copia pretzisa de sa Cresia de Istella Maris a su parrocu sou, don Filippo Corrias. Naschidu in su 1954, Lai si delettat dae tempus a faghere monumentos de sa tzittade, mustrande una destresa e una passione chi lu marcant.

S’amore sou fungudu po sas bellesas de sa idda sua,Tortulè, si biet a subraera in sas operas chi faghet, donzuna prena de diligu e de unu apegu unicos.

Giai in passadu, s’abilidade artistica sua at acciappidu issida in sa copia de sa sea de sant’Andria, cussinnada a sa parrocchia ghiada dae don Crobeddu,coberande ammirassione e appretziamentu da tottu sa comunidade. Intames, custa borta, s’impignu sou si est cuncentradu supra de sa Cresia de Istella Maris.

Pustis de meses longos de dedissione e impignu, su fruttu de su tribagliu sou est bistadu bocadu a campu a sos ogios de sa comunidade sua. Sa Cresia de Istella Maris, fraigada in su 1966, torrat a bida como in tottu sa magnifficentzia sua, po mesu de custa copia fatta a manu. Donzi partigulare, dae su maestosu campanile a sos cumplicados tarassios de su portale, est bistadu copiadu cun abilesa e cura de sos particulares pius pitticcos, testimonzande s’amore e su rispettu chi Lai tenet po su patrimoniu de sos progettos de sa tzittade sua.

Usande taulas cun pius pizos, s’artista at ischidu acciappare s’essentzia e s’ambiente sacru de custu logu de cultu. Sos internos de sa Cresia, riccos de figuras e istoria, sunt bistados rendidos cun d’una pretzisione chi at aggioccadu, leandeche sos osservadores in d’una devossione e ispiritualidade fungudas.

Donzi angulu, donzi arcu e donzi pintura a friscu sunt bistados copiados cun d’una fidelidade istravanada, donande a sos ispettadores un’esperientzia de visione unica e chi istrasinat. S’integru de custa opera de arte est bistada accollida cun galabera e ingraenzu dae parte de sa comunidade de sa parrocchia, chi at pottidu iscoperrere sa bellesa e s’importantzia de su propriu logu de cultu po mesu de sos ogios de s’artista.

Gratzias a su talentu e sa dedissione de Mario Lai, sa Cresia de Istella Maris sighit a bivere e ispirare cussos chi si
accostant cun fide e devossione, mentres s’amore de s’artista po sas bellesas de Tortulè, brillant po mesu de donzi elementu de sa creassione sua, assentande s’istoria e religiosidade de sa tzittade.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22