Peri ocannu s’at a torrare a fàghere su torneu istadiale de Pallavolo de plàia, s’eventu prus isetadu de s’istade. Su campionadu, nàschidu dae s’initziativa de is amantiosos de custu isport chi cada istade prenent is campos a probe de mare, est diventadu un’adòbiu de grandu interessu pro professionistas e apassionados de  s’Ogiastra e finas de sa Barbàgia. Medas is iscuadras prontas a s’afrontare cada sero in su campu isportivu de Gelisuli, tra làgrimas e suore, regalende a is ispetadores ispàssiu e disaogu.

S’adòbiu isportivu, lòmpidu giai a sa de chimbe editzione, cheret cummemorare sa bonànima de  Fabio Pitzalis. Su torneu si displigat segundu sa fòrmula de su 4X4 mistu, e apenas incumentzadu faghet a bìdere is primos ispantos. Giai dae is primas iscutas su livellu si presentat giai artu gràtzias a sa partetzipatzione de unu muntone de veteranos acostagiados dae medas giovànos de bonas promissas. Custa cumpetitzione ogna sero at a regalare a is ispetadores oras de emotzione e de bonu isport, ma is mègius iscuadras ddas amus a pòdere bìdere petzi  tra su 9 e su 10, est a nàrrere in sa fase preliminare de su torneu, ocannu articulada in cunforma a sa modalidade clàssica de su girone a s’italiana. In sa prima fase de sa gara s’ant a afrontare duas iscuadras chi ant iscaladu sa classìfica in pagu tempus, sa “Turismar” de Luca Ammendola e Alessio Aresu e sa nuorese “Socrates” de Franco Filia, chi pròpiu eris sero si sunt afrontadas pro prima bia in su campu e nois de Vistanet amus cumpudadu sa partida in contu bostu. Custa sa crònaca:

Pagos faeddos a in antis de s’adòbiu, petzi cuntzentratzione e mudìmene. Ognunu ischet ca non podet fàghere faddina. Puntos fatos a sa renfrusa chi s’intrèvenant a ischiatzadas chi ispantant su pùblicu. Sa potèntzia fìsica de su foramanu de s’iscuadra de is “Socrates” faghet tìmere a totus, francu a su muru de sa “Turismar”,  ordinadu e eficatze, denneghende unu muntone de puntos a is aversàrios e faghende∙nde totalizare àteros pro issos etotu. E cando s’iscuadra s’agatat apretada, mescamente in sa serrada de su set, Ammendola est capassu de pigare a sa manu s’iscuadra e de leare a domo su resurtadu. Cando in fatu sa fortza non bastat prus tando is duas iscuadras incumentzant a giogare cun malìtzia, cun mòvias farsas e pallonetos: est tando chi initziat s’ispetàculu. Cun grandu acòrdiu tra s’artziadore e s’ischiatzadore de is “Socrates”, is nugoresos mustrant s’atza issoro e renessent a agatare is fortzas chi crediant de àere ispatzadu: su segundu set est s’issoro.  Immoe non si podet fàghere perunu isbàlliu e totus dd’ischent. Su suore calat a istidda a istidda, is mùsculos sunt istrirados finas su màssimu ma nemos intendet s’istrachesa pro ite niunu bolet pèrdere; pagos faeddos in s’ora de pasu de su time out, petzi isprenetu e atza meda. Tra is duas iscuadras immoe est gherra aberta. Pallonetos, bòtzas segadas e piatzadas e sa “Turismar” nche isciaddet in un’ibitu a is aversàrios. Sa lòmpida est indedda e ischent de dda pòdere aguantare. Cumandados dae Ammendola, is cumpàngios boddint unu puntu fatu a s’àteru e concruent sa partida leande∙si a domo duos puntos  chi ddis faghent balangiare su primu posti in sa classìfica.

Sa cuntentesa de is binchidores però no est meda. Difatis ischent chi su torneu est galu longu e chi in custu isport su resurtadu si podet furriare in deretura. Bos amus a ischire finas de is àteros adòbios.  Pro como sa classìfica est custa:

SCUADRA    PUNTOS

Turismar    15

Socrates    13

Serra Ceramiche    13

Frailis Animazione    12

Eureka    9

Marmock Beach    9

La Baia    7

Titanic    0

Falegnameria Pani    0

---

© RIPRODUZIONE RISERVATA

Si serrat cun d’unu bilanciu cumplessu sa chida de abbizu po su tempus malu chi at interessadu sa Sardigna, sinzata dae ira de abba, bentu forte e marettadas chi ant postu sutta de pressione medas zuras de s’isula.

Sa fase pius critiga est bistada dae s’incuminzu e sa metade de sa chida, cando sa Protessione Tzivile at dadu sa cramida de livellu ruggiu po arriscu idrogeologicu e po s’abba. Sas cundissiones de su tempus contrarias ant corpadu in manera particulare sa parte de giosso e est de sa Sardigna, cun Campidanu, Iglesiente e sas zuras attraessadas dae sas caudas de su Flumendosa e Flumineddu intre sas pius esponnidas a s’abba chi proiat semper de pius, mentres in sas costas si sutzessaiant marettadas fortes e corfos de bentu chi sunt arrivados a intensidade manna.

Problemas sunt bistados signalados in su Nord de s’isula, dae sa Gaddura a su Logudoro, inube s’abba e su bentu ant criadu problemas in tottue. Paritzos sos interventos de sos Vigiles de su Fogu po allagamentos, smuronamentos, arbules ruttos e carrelas inube non si podiat passare, cun calicuna serrada po prevensione. Medas Comunes ant serradu sos uffitzios insoro e sas iscolas, sos parcos e sos campusantos, mentres sas isquadras de Protessione Tzivile ant controlladu flumines e trainos.

Su contu de sos dannos lu sunt ancora faghinde, ma bi sunt problemas po sos impiantos, attividades de sa laurantza e cussas de sas costas, chentza chi po su mamentu bi siant mortos o fartados graes. Una cosa custa chi si pensat bi siat po sa bonidade de su sistema de abbizu e sa risposta lestra de sas istrutturas de emergentzia. Commente sun mezzoradas sas cundissiones de su tempus in su fine chida, s’abbizu est bistadu minimadu, mancari addutret arta s’attentzione po fenomenos frastamazos e po controllare sos dannos fattos dae su tempus malu chi at sinzadu in manera importante sa chida in Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22