Eliconie eventi: frischesa, simplidade e atmosfera familiare a su servìtziu de sa comunidade tortoliesa. In su panorama culturale e artìsticu de Tortolì est pro fàghere sa cumparta unu capìtulu interessante nou firmadu “Eliconie Eventi”.

 S’assòtziu culturale, una criadura nàschida dae s’idea dae is tres giòvanas tortoliesas Elisabetta Usala, Michela Girardi e Monica Cabiddu,  sàbadu 17 de martzu  a is 19.30, at a abèrrere pro sa prima bia is ghennas a is bisitadores in sa turre de Santu Micheli in Àrbatax, cuntzèdida pro s’ocasione dae s’amministratzione comunale de Tortolì. “Eliconie Eventi- ispiegat su presidente de s’assòtziu culturale Elisabetta Usala- at boddidu su nùmene dae is noe musas grecas amparadoras de is artes. Sa prioridade nostra est cussu de aparitzare eventos culturales de diferente natura in intro de su territòriu tortoliesu, pro fàghere a manera chi sa tzitade de Tortolì leet dae s’arte e dae sa cultura motivatziones  e prospetivas noas”.

Is faeddos crae de s’assòtziu sunt bator: cumpartzimentu, ispàssiu, cultura e ambiente. “Is sòtzios de Eliconie- at naradu Michela Girardi- ant a tènnere s’ocasione de s’ispassiare in manera sana e in un’ambiente friscu, arbistu, e semper abertu a is ideas de is àteras realidades assotziativas ogiastrinas e de totus is tzitadinos chi bolent donare s’agiudu issoro. Est pròpiu s’interatzione tra is assòtzios chi tenimus prus a coro. Creo chi gràtzias a sa cooperatzione cun realidades diferente dae sa nostra podimus tènnere unu bonu profetu in totu is progetos nostros”. Custas pitzocas tenent su grandu mèritu de tènnere un’incuru mannu pro s’ambiente. “Cale si siat progetu chi tenimus in conca- at naradu Monica Cabiddu- s’at a acumprire donende cura a s’ambiente e respetende sa natura pro mèdiu de s’impreu de materiales retziclados, ecològicos e biològicos. Finas s’istemma nostru chi est de colore viola e nieddu, s’at a colorare de birde cada bia chi sa manifestatzione at a tratare unu tema ambientalista”.

 S’assòtziu est galu printzipiende s’atividade sua, ma a cantu paret is ideas non mancant e is tres fundadoras non tenent gana de abarrare cun is manos iscude iscude. In ocasione de s’inauguratzione, difatis, Eliconie Eventi at a aparitzare sa mustra “39°56’12.17’’N – 9°42’23.29’’E, nùmene curiosu chi si riferit a is coordinadas pretzisas de su puntu in ue s’agatat sa turre de Santu Micheli. Sa fortilesa, difatis, s’at a prènnere de lughes e de colores gràtzias a is fotografias de su tataresu Luca Cantarelli e a is installatziones de Donatella Ceria. Eliconie Eventi cheret fàghere a manera chi sa Turre, torrada a nou dae pagu tempus, bèngiat bìvida e istimada dae sa tzitadinàntzia. Pro permìtere a totus de dda bisitare, sa mustra “39°56’12.17’’N – 9°42’23.29’’at a èssere aberta ogna die dae su 17 a su 25 de martzu, dae is 10:00 a is 13:00 e dae is 16:00 a is 21.00.” Subenende sa data de s’adòbiu, sàbadu 17 martzu a is 19.30, auguramus a Eliconie Eventi unu bonu cumèntzu!

Portale digitale novu in Nugoro pro mezorare s’impittu de sas meighinas.

Unu sistema digitale novu pro conduire menzus sas meighinas e mezorare sa calidade de sas curas gratzias a un’impittu prus attentu de sos datos. Est custu s’intentu de Duttore Digitale, unu portale creadu pro rendere prus fatzile sa tramuda de informatziones intre dittas sanidarias e duttores e pro minimare sos isperdissios in s’ispesa de sas meighinas.

Sa base permittit de controllare e registrare sas retzettas de sos duttores recoglinde e esaminande sos datos supra de sas meighinas.In custa manera donzi duttore podet biere in manera simple e azzorronada comente faghet sas retzettas e cunfrontare sos datos suos cun cussos de s’Asl. Su disignu est bistadu presentadu in Nugoro in su mentres de unu addobiu ordiminzadu dae s’Asl n.3 imparis a sas zuras sotzio sanidarias. Ant partetzipadu duttores de base, de sos pitzinnos e proffessioneris de sos ambulatorios de s’iscrocca.

Su portale permittit a sos duttores de controllare s’attividade insoro dae su puntu de bista de sos costos e de sas cantidades faghinde sas retzettas cun prus attentzione e bidinde si bi sunt errores o cosas chi no andant bene. Intre sas funtziones printzipales bi sunt bilancios personalizzados e sinnos automaticos chi azzuant a cumprendere si bi sunt differentzias in cunfruntu a sos istandard prevedidos, mezorande su controllu de sas retzettas.

Custu sistema est unu primu passu assa parte de un’impittu prus zustu de sas meighinas cun vantazos siada pro sos malaidos chi podent rezire curas menzus, siada pro su sistema sanidariu chi podet minimare sos affianzos chi si podent evitare e impittare menzus sas disponibilidades. Su portale at azzuare fintzas S’Asl a connoschere in presse meda sos problemas in sas retzettas e intervennere in manera lestra pro garantire un’impittu prus siguru e balidu de sas meighinas.

In afficcu istrumentos comente custos podent dare unu contribbudu a rendere sa sanidade semper prus moderna e accanta a sos bisonzos de sos tzittadinos. S’impittu de sos datos, difattis,permittit de leare detzisiones prus scientes e mezorare s’ordiminzassione de sos servitzios e accottare su tribagliu de sos duttores in su controllu de sos malaidos mescamente in sos casos prus cumplicados. Sa digitalizzassione si cunfirmat gai una leva de fundamentu pro fraigare unu sistema sanidariu prus balidu, agguantabile e capatze de apparare curas de calidade a tottus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22