Unu grupu chi est nàschidu dae un’amigàntzia e dae una passione comuna pro sa mùsica in generale e pro s’isperimentatzione in particulare.  Semus alleghende de is Outcube, band tortoliesa lòmpida oe a su segundu discu produidu dae s’eticheta  “This is core” e intituladu “Anima Liquida”. Su grupu est formadu dae Mauro Aragoni (boghe, percussiones, tastieras, testos), Giuseppe Rigogliuso (chiterra e testos), Elias Porcu (bateria), Salvatore Scattu (bassu) e Emilio Hiernaux (chiterra). Andamus a fàghere una bella chistionada cun su frontman de su grupu.

Mauro, conta∙nos de bois chimbe.

Connosco a Giuseppe dae cando tiraìamus petzi 70 cm. Fatzo mùsica cun issu dae cando tenìamus 11 annos! E is àteros ddos apo connòschidos in is iscolas superiores. Semus unidos che frades!

Ite mùsica iscurtades?

Iscurtamus gèneres diferentes, ognunu de nois tenet is preferèntzias suas. Ddoe est chie iscurtat su death metal, chie su punk, chie su rap, chie sa mùsica eletrònica e gosi sighende. A sa fine non nos si ponimus mai làcanas e iscurtamus totu su chi nos agradat. Comente naro a s’ispissu, sa mùsica est totu bella cando est fata cun su coro!

Cales sunt is artistas chi bos ant influentzadu musicalmente?

Nois non si riferimus a una band ebbia, ma potzo nàrrere chi fortzis, sena nos nde agatare, nos ispiramus meda a is Incubus, a is Litfiba, a is A perfect circle, a is Metallica, a is Nirvana, a is Pink Floyd, a is Timoria, a is Korn, a is Tool, a is Deftones e a is Prodigy.

Comente ddu dias a descrìere su primu discu bostru?

Pro fàghere su primu discu nche amus postu medas annos e creo chi prus de un’album est una compilation, est a nàrrere una regorta de cantzones fatas in perìodos diversos. Est vàriu e unu pagu “psichedèlicu” e cuntenet branos siat in inglesu, siat in italianu.

Allegamus immoe de s’ùrtimu traballu bostru.

S’album nou est pròpiu cussu chi bolìamus: unu traballu melòdicu, romànticu, paranòicu, chi si podet iscurtare cun praghere e bene cuncordadu. Un’album chi tenet unu sentidu e unu caràtere suo, prus che totu pro ite totu is petzos sunt in italianu.

 Ite nde pensades de s’iscena musicale sarda?

S’iscena musicale sarda est interessante meda ma a dolumannu pagu connòschida. Su de bìvere in un’ìsola fortzis non nos agiudat meda. Is grupos milanesos chi cherent aparitzare unu tout afitant unu Fiorinu, pigant e movent. A nois imbetzes nos andat male a nos ispostare pro more de is ispesas. Connosco una meca de band de valore de ogna genia e de paritzas biddas, comente a is Solid Vision, a is Bavarja o a is prus famados Sikitikis. Duncas, in s’ìsula nostra ddoe sunt medas band de grandu mèritu e de balia.

Tenides in programma carchi cuntzertu?

Eja, semus traballende pro fàghere unos cuntzertos ma galu no amus fissadu is datas. Amus a presentare sena duda unu cuntzertu mannu in Tortolì custa istade. Pro is àteras tapas, pro s’ora  est mègius a no nàrrere nudda…

Progetos pro su tempus benidore?

Luego amus a traballare in pitzu de is sìngulos e subra de is video chi amus a lantzare. Semus difatis averiguende unas iscenegiaturas diversas. Su progetu est cussu de non nos firmare mai e de sighire a andare a in antis faghende semper mùsica bella e bona.

Luego, in esclusiva, su vìdeo nou de is Outcube, sa ballada acùstica intitulada “Non può durare per sempre”. Bona iscurtu a totus!

Blackout in su Prontu Succursu de su Santissima Trinidade: un’interrogu a su Ministru de sa Salude.

Su blackout chi at interessadu su prontu succursu de s’ispidale Santissima Trinidade de Casteddu sighit a faghere discutire e sustentare unu cunfrontu politicu istitutzionale allummadu meda. S’accadimentu, chi at postu in difficultade manna unu de sos printzipales ispidales de sa tzittade, at fattu narrere su parrere suo a Ugo Cappellacci, presidente de sa cummissione Affares Sotziales e Salude de sa Camera de sos Deputados, chi at comunicadu sa presentatzione de un’interrogu in su Parlamentu a su Ministru de sa Salude, Orazio Schillaci.

Secundu cantu pensat issu, cantu est sutzessu est grae meda, non solu po sas conseguentzias supra s’attividade de su Prontu Succursu, ma puru pro itte si inficchit in d’unu cuntestu prus mannu de crititzidades ligadas a su controllu de sa sanidade regionale. S’ex presidente de sa Regione Sardigna at gameddadu su chi est sutzessu a cussa chi at deffinidu una fase forte de istabbilidade politiga e amministrativa, annodditada dae seperos de guvernu cuntestados e dae una situassione de dudesa chi, po comente la pensat issu, si reflettit derettu supra sos servitzios essentziales.

Su blackout at provocadu sa frimmada de s’energia elettrica e sa frimmada de medas servitzios de fundamentu. Intre sos problemas printzipales signalados bi est bistada sa mancantzia de funtzionamentu de ordinzos netzessarios comente sa Tac, elementu tzentrale po sas
emergentzias. Sa frimmada de custos istrumentos at tentu unu corpu derettu supra s’operatividade de sa sezione.

S’assistentzia sanidaria est bistada garantida solu gratzias a sos sistemas de emergenztia, ma cun d’una difficultade manna. Sa situassione at tentu problemas supra sas curas, sos tempos de interventu e supra sa calidade cumplessiva de s’assistentzia. Propriu po accomettare a s’impossibilidade de operare in prenu, medas malaidos che sunt bistados leados a sos atteros prontu succursos tzittadinos, in manera particulare a su policlinicu de s’Universidade e s’ispidale Brotzu, ispidales chi giai dae tempus operant in cundissiones de aggravamentu po more de sa mancantzia de pessonale, lettos e benes.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22