Unu grupu chi est nàschidu dae un’amigàntzia e dae una passione comuna pro sa mùsica in generale e pro s’isperimentatzione in particulare.  Semus alleghende de is Outcube, band tortoliesa lòmpida oe a su segundu discu produidu dae s’eticheta  “This is core” e intituladu “Anima Liquida”. Su grupu est formadu dae Mauro Aragoni (boghe, percussiones, tastieras, testos), Giuseppe Rigogliuso (chiterra e testos), Elias Porcu (bateria), Salvatore Scattu (bassu) e Emilio Hiernaux (chiterra). Andamus a fàghere una bella chistionada cun su frontman de su grupu.

Mauro, conta∙nos de bois chimbe.

Connosco a Giuseppe dae cando tiraìamus petzi 70 cm. Fatzo mùsica cun issu dae cando tenìamus 11 annos! E is àteros ddos apo connòschidos in is iscolas superiores. Semus unidos che frades!

Ite mùsica iscurtades?

Iscurtamus gèneres diferentes, ognunu de nois tenet is preferèntzias suas. Ddoe est chie iscurtat su death metal, chie su punk, chie su rap, chie sa mùsica eletrònica e gosi sighende. A sa fine non nos si ponimus mai làcanas e iscurtamus totu su chi nos agradat. Comente naro a s’ispissu, sa mùsica est totu bella cando est fata cun su coro!

Cales sunt is artistas chi bos ant influentzadu musicalmente?

Nois non si riferimus a una band ebbia, ma potzo nàrrere chi fortzis, sena nos nde agatare, nos ispiramus meda a is Incubus, a is Litfiba, a is A perfect circle, a is Metallica, a is Nirvana, a is Pink Floyd, a is Timoria, a is Korn, a is Tool, a is Deftones e a is Prodigy.

Comente ddu dias a descrìere su primu discu bostru?

Pro fàghere su primu discu nche amus postu medas annos e creo chi prus de un’album est una compilation, est a nàrrere una regorta de cantzones fatas in perìodos diversos. Est vàriu e unu pagu “psichedèlicu” e cuntenet branos siat in inglesu, siat in italianu.

Allegamus immoe de s’ùrtimu traballu bostru.

S’album nou est pròpiu cussu chi bolìamus: unu traballu melòdicu, romànticu, paranòicu, chi si podet iscurtare cun praghere e bene cuncordadu. Un’album chi tenet unu sentidu e unu caràtere suo, prus che totu pro ite totu is petzos sunt in italianu.

 Ite nde pensades de s’iscena musicale sarda?

S’iscena musicale sarda est interessante meda ma a dolumannu pagu connòschida. Su de bìvere in un’ìsola fortzis non nos agiudat meda. Is grupos milanesos chi cherent aparitzare unu tout afitant unu Fiorinu, pigant e movent. A nois imbetzes nos andat male a nos ispostare pro more de is ispesas. Connosco una meca de band de valore de ogna genia e de paritzas biddas, comente a is Solid Vision, a is Bavarja o a is prus famados Sikitikis. Duncas, in s’ìsula nostra ddoe sunt medas band de grandu mèritu e de balia.

Tenides in programma carchi cuntzertu?

Eja, semus traballende pro fàghere unos cuntzertos ma galu no amus fissadu is datas. Amus a presentare sena duda unu cuntzertu mannu in Tortolì custa istade. Pro is àteras tapas, pro s’ora  est mègius a no nàrrere nudda…

Progetos pro su tempus benidore?

Luego amus a traballare in pitzu de is sìngulos e subra de is video chi amus a lantzare. Semus difatis averiguende unas iscenegiaturas diversas. Su progetu est cussu de non nos firmare mai e de sighire a andare a in antis faghende semper mùsica bella e bona.

Luego, in esclusiva, su vìdeo nou de is Outcube, sa ballada acùstica intitulada “Non può durare per sempre”. Bona iscurtu a totus!

Einstein Telescope, sa Sardigna puntat supra Sos Enattos: un’istrumentu pro istudiare s’univressu.

S’Einstein Telescope est un’istrumento iscientificu addaenantis medas chi at a permittere a sos istudiosos de iscrudignare sas undas gravitatzionales chi arribant dae s’univressu primarzu e de istudiare sos fenomenos de su trettu chi oe non podimos ancora biere.

Si trattat de unu osservadoriu de ingendra nova chi nos at a podere azzuare a cumprendere menzus comente est naschidu e creschidu s’Univressu. Gratzias a sa dilighesa manna sua at essere possibbile iscrudignare abbenimentos cosmicos istravandos comente sa tumbada intre toffos nieddos o intre istellas de neutrones abbeniddos miliardos de annos faghet.

Sa Sardigna at a presentare ambas sas possibbiles formas de s’osservadoriu: cussa a triangulu e cussa cun duas istrutturas a forma de L. Carchi istudiu at mustradu chi sa soluzione cun duas L diat podere dare risurtados iscientifficos menzus e minimare carchi arriscu tennicu. S’idea est cussa de faghere custa solutzione imparis a sa Sassonia, creande una collaborassione intre Istados Europeos divressos supra unu de sos disignos iscientificos prus importantes de sos annos imbenientes.

Pro sos iscientziados su situ de Sos Enattos, in s’iscrocca de Luvula, est unu de sos logos menzus in su mundu pro fraigare custu osservadoriu. Est difattis una zura meda muttiga dae su puntu de bista sos terremotos e casi briva de cale si siat burdellu motivadu dae sas attividades de s’omine. In prus sa rocca presente sutta de terra est adatta meda a sos iscavos netzessarios pro fraigare sas istrutturas chi ant a accasazzare sos istrumentos iscientifficos.

Su fraigu suo diat podere mustrare un’occasione manna po s’iscrocca. Unu disignu comente custu podet battire imbestimentos novos e occasiones meda de formazione. Sa presentzia de s’osservadoriu diat podere favoressere sa creschida de sa chirca iscientifica e apparare possibilidades novas pro istudiantes,chircadores e tennicos chi tribagliant in sas zuras de s’iscientzia e de s’inzennieria.

Unu fraigu iscientificu gai importante diat podere battire beneffissios fintzas a s’accolomia locale. A inghiriu de su disignu diant podere naschere attividades novas ligadas a sa chirca, modernissassione e servitzios chi serbint pro accotzare unu tzentru iscientificu internatzionale mannu meda. In prus diat podere affortigare sa collaborassione intre universidades, tzentros de chirca e istitutziones europeas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22