Sàbadu 17 de su mese de idas, in su Museu Tzìvicu de Lanusè, est istada inchingiada sa mustra personale de Francesco Spatara intitulada “Fèminas e Lupos” (Donne e Lupi). S’artista de orìgine calabresa ma dae meda in Ogiastra, a pustis de unu perìodu mannu de meledu e de mudìmene at selladu de rèndere pùblicas is òperas fatas in is ùrtimos annos de atividade. S’espositzione de is cuadros suos s’artìculat in is tres pianos de su Museu Tzìvicu de Lanusè e presentat a su pùblicu prus a mancu una setantina de òperas, espostas a manera sàbia, prenas de significadu e de sentidos cuntrastantes. Sa mustra si podet visitare finas a su 30 de ghennàrgiu 2012. Ambos duos faghent parte de unu progetu culturale chèrfiu dae B&BArt Museu de Arte cuntemporànea chi “promotzionat e imbestit in s’arte contemporànea, donende a is artistas pagu famados de fàghere connòschere su percursu artìsticu issoro”.

Su Diretore artìsticu e curadore de sa mustra e de su catàlogu est una fèmina ispetziale meda: Bianca Laura Petretto, giornalista e esperta de arte moderna, contemporànea e orientale. Alleghende de is òperas de Francesco Spatara at naradu chi in intro de issas si ddoe podet agatare “una tristura marcada, unu dolore allupadu, unu disìgiu acuadu, una passione negada, chi prenent is immàgines mannas e is fèminas amarguradas, mudas, discapassas de donare boghe a is carenas issoro chi si mustrant comente cuintas dae pompiare. Is cuadros de Spatara afigurant imàgines chi sunt fatas pro contare istòrias fitianas acuadas de ogni die, pro iscobèrrere su valore de unu sinnu cun is ogros ispantados de chie colat pompiede“. A s’inchìngiu de sàbadu (ue ant presentziadu Spatara e sa curadora de sa mustra) ant leadu parte curiosos, amantiosos de arte e finas persones de contu de s’iscena culturale de s’Ogiastra. Su brègiu de totus is presentes fiat nòdidu. Francesco Spatara at bìnchidu una iscumissa giocada cun isse etotu e sun s’arte!

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22