Su “Prèmiu Professionista de su Turismu 2011” est istadu donadu a Raffaele Sestu e a Lorenzo Giannuzzi. Sa tzerimònia s’est tenta dòminiga 27 in s’àula de su Consìgiu Provintziale de su Palàtziu Règiu de Casteddu, in presèntzia de s’Assessore regionale de su Turismu Luigi Crisponi, de su presidente de sa Provìntzia Graziano Milia e de s’Assessore de su Turismu de sa Provìntzia Piero Comandini.

Sa manifestatzione, aparizada dae su Sòtziu Skal Club International de Casteddu, cheret premiare cussas personalidades chi ant favoressidu a s’isvilupu de su turismu in Sardigna e a s’isparghimentu de sa cultura e de s’ospitalidade de is Sardos.

 Raffaele Sestu, mèigu artzanesu, organizadore in Àrthana de sa manifestatzione “Il Porcino d’Oro” e presidente regionale de is Pro Locos, si dèdicat de paritzos annos cun passione a sa valorizatzione de is traditziones, de sa cultura e de s’ambiente de sa Sardigna. A su diretore de su Forte Village, Lorenzo Giannuzzi, imbetzes,  su reconnoschimentu pro àere contribuidu a sa calidade turìstica de sa Sardigna a livellu internatzionale.

Ispidale de Santu Bainzu firmu a su palu:ritardos chi iscobiant unu sistema chentza disignu.

S’abertura de s’ispedale nou de Santu Bainzu Monreale patit unu rinviu novu e, segundu sas istimas prus reghentes, s’ispidale no at a èssere operativu a innantis de su 2027. Una data ancora a tesu, mescamente si  si cunsiderat chi s’istùdiu de possibilidade est de sa segunda metade de sos annos Duamìzza e chi su cantieri, cumintzadu in su 2022, est bistadu prenu de abbaccamentos, firmadas e torradas a cumintzare chi ant fattu su percursu isvariadu meda.

Su ritardu de su cantieri ponet in lughe una difficultade prus manna: sa Sardigna bivet dae annos sa mancàntzia de una progetatzione sanidària firma e coerente. S’Ìsula non tenet unu pranu azzorronadu e abberu orientadu a sos bisònzos de sas comunidades, pro itte s’ùrtimu Pianu sanidàriu regionale est de su 2007. In su mentres, si sunt sighidas refformas e cuntra refformas, acuntzentramentos e cummissariamentos chi non ant resòrvidu sos problemas istruturales de s’assentu sanidàriu regionale.

A cumplicare de prus  su cuadru est sa crèschida de su campu privadu, in manera particulare si biet in sos tzentros prus populados, in ue ant pigadu forma poliambolatòrios modernos e istruturas chirùrgicas novas capatzes de apparare servìtzios lestros. In parallelu, sa salude pùbrica fadigat semper prus a garantire sas prestassiones netzessàrias, cun su perìgulu beru de allargare sa distantzia intre chie podet atzèdere a curas deretas agguantande costos privados e chie imbetzes est costrintu a si cunfrontare cun listas de isettu, tempos longos e mancàntzias organizativas.

In su Campidanu Mesanu, logu chi isettat unu ispidale novu dae belle vinti annos, custa dèbilesa est evidente meda: sa meighina de s’iscrocca s’est afortigada a pagu a pagu, medas bàrdias mèigas ant serradu o minimadu sos òrarios, sos mèigos de base non bastant e sos servìtzios netzessàrios benint dados cun difficultade. Comunidades intreas s’agatant a bìvere gai in d’una cunditzione de emergèntzia donzi die.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”