Su logu prus famadu de sa Sardigna est peri cussa chi in is ùrtimos chimbant’annos at tentu su prus mannu isvilupu econòmicu. Si provamus a preguntare a unu turista basti chi siat in cale parte de sa Sardigna s’agantant is Montes de Mola, seguru ca no ischit chi s’agatant pròpiu in Costa Ismeralda. De ogni manera, tempus a in antis chi su prìntzipe Ismaelita Karim Aga Khan incumentzaret a imbestire su dinare suo in cussu logu, unu nùmene gosi àspidu inditaiat una costa crispa e àspida etotu, però ispantosa!

A printzipiare dae is primos annos Sessanta, s’Aga Khan aiat cumentzadu a fraigare su paradisu suo, chi in pagos’annos si fiat trasformadu in su polu de su turismu internatzionale de èlite. Su paradisu de Allah in terra, si fiat ismanniadu e potentziadu gràtzias a unu Tzìrculu Nàuticu e a is primos albergos e resort. Totu suta su controllu de unos de is prus mannos architetos de su sèculu pagados dae su Prìntzipe e dae is sòtzios suos. Is Montes de Mola sunt istados trasformados in unu produtu, adatados a sa bèndida, sighende règulas urbanìsticas e ambientales severas: respetu de s’ambiente naturale e recùberu de s’istile de fràigu gadduresu, torradu a bisitare in crae moderna. Una prenda pro pagos, unu paradisu areste a sa portada de is turistas prus dinarados e prus famados.

Oe, dae ogiastrinos nos preguntamus comente custu mèraculu est pòdidu resèssere. Nos preguntamus si finas s’Ogiastra tèngiat custa possibilidade. Oe in die pensamus ca nono, pro more de sa paga abistesa nostra. Custas sunt is càusas de su mancadu isvilupu de sa terra nostra. Su produtu nostu est istadu cuncordadu sena garbu perunu e prenadu de chimentu in ogna logu. S’oferta chi podimus dare a su turista est una cosa omologada. Cussu chi faghet custa terra unu logu ùnicu, est a nàrrere is abitantes suos e is traditziones, non faghent parte de s’oferta. In pagos faeddos a su turista benit donadu su chi podet èssere donadu in cale si siat logu de su mundu. A parte custu, peri un’àtera pregunta si ponet pro is generatziones chi ant a bènnere: tenimus a beru bisòngiu de diventare una segunda Costa Ismeralda? Depimus nois puru pèrdere is meravizas de sa terra nostra in nùmene de s’isvilupu e de su dinare? In beridade semus giai de diora in cust’àndala, ma però cun resurtados calitativos chi non si podent nemmancu paragonare a cussos de sa costa gadduresa.

Sas vias de sa tramuda, a daenantis cun iscavos e balorizzatzione: risurtados novos in sos nuraghes de Tortulè e Triei.

Andant a daenantis cun resurtados importantes sos interventos de iscavu,accontzu e balorizzatzione de sas alas nuragicas intzididas in su disignu “Sas vias de sa tramuda” in Ozzastra. Duos in particulare sos logos interessados dae sos tribaglios: su nuraghe s’Ortali ’e su Monti in s’iscrocca de Tortulè, e su nuraghe Bau Nuraxi de Triei, ambos duos a su tzentru de avantzamentos importantes supra su pianu iscientificu e de su recreu pubbricu de su tempus benidore.

A s’Ortali ‘ e Su Monti, unu de sos sitos  appillados prus nodidos e bisitados de s’Ozzastra, est finida sa fase de iscavu archeologicu. Su cumplessu, chi accansat nuraghe,pobuladu, tzirculu megaliticu, domus de janas e tumbas de tzigantes, sighit a torrare notissias novas mancari sos istudios los fettant dae tempus meda. Sas scruccullas fattas dae pagu ant fattu iscoperrere atteras zuras de interessiu, amprariande sas connoschentzias supra su situ e arricchinde s’esperientzia culturale apparada a sos bisitadores.

S’interventu, fattu sutta s’affilamentu de sas Sovrintendentzias archeologicas, est bistada fatta mescamente po una turre accosta e s’antemurale de su nuraghe. In su mentres de sos tribaglios sunt bistados iscopertos po su prus, picculos de isterzos de attividades in domo, comente su tessinzu e s’ammaniada de sa cosa de pappare. Finida sa fase de iscavu, su disignu bintrat como in d’una fase nova chi prenettat interventos de accontzu, su faghere un’impiantu novu de sa lughe- pensadu fintzas po su sero, e sa creassione de unu caminu novu po bintrare a su monumentu. Si at a faghere puru s’azzorronamentu de su sistema de sas notissias e de sos poster, po rendere prus fatzile sa bisita e mezzorare sa cumpresa de unu situ de cumplessidade manna. Sa summa totale de sos tribaglios, partidos in su mese de aprile 2025 est de casi 200.000 euros.

Novidades importantes arribant puru dae su nuraghe Bau Nuraxi de Triei, inube in su mese de martu passadu sunt bistados cussinnados sos tribaglios de iscavu. Su situ, chi est mannu meda e de importantzia iscientifica, fuit bistadu scudrignadu solu in partzialidade in sos annos Ottanta. S’interventu de oe interessat in manera particulare sa zura chi andat a sa parte de su riu, una zura sinzada dae sa prena de su 2008 chi aiat fattu dannos a una parte de su cumplessu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22