Progetu Archeogliastra: laboratòrios gratùitos de archeologia pràtica e de fotografia
Su sòtziu Alea Onlus, in paris cun sa Cnosfap Salesianos e cun su patrotzìniu de sa Regione Autònoma de Sardigna, aberit is ghennas a chie bolet connòschere sa vida de is antepassados nostros pro mèdiu de unu laboratòriu de archeologia
Su sòtziu Alea Onlus, in paris cun sa Cnosfap Salesianos e cun su patrotzìniu de sa Regione Autònoma de Sardigna, aberit is ghennas a chie bolet connòschere sa vida de is antepassados nostros pro mèdiu de unu laboratòriu de archeologia pràtica. Su cursu, de badas e abertu a chie si siat, si tzèrriat Progetu Archeogliastra e at a èssere partzidu in bator mòdulos (Sa cassa in sa preistòria; Su tessòngiu e s’intritzu; Sa tzeràmica; Sa fusione de su metallu) pro mèdiu de is cales at a èssere possìbile imparare a fraigare is armas preistòricas comente a s’arcu e is fritzas, traballare is fibras vegetales e animales, imparare is tècnicas pro traballare sa tzeràmica, su ràmene e su brunzu.
Is addòbios s’ant a fàghere su martis a merie in Lanusè dae is 4 a is 7. is minores de edade ant a dèvere èssere acumpangiados dae unu mannu. A su acabu de ogna addòbiu ddoe at a èssere finas unu cursu de fotografia digitale cun bessidas ghiadas e bìsitas a is monumentos archeològicos prus bellos de s’Ogiastra. Is fotos prus galanas ant a èssere publicadas in su catàlogu de su progetu Archeogliastra e ant a èssere postas in sa mustra “MUSAS, s’istòria de s’òmine in Sardigna”, chi s’at a pòdere bìdere a canta su CNOS-FAP Salesianos Sardigna e in Lanusè, a canta sa Biblioteca Salesiana (cullègiu salesianu).
Informatziones: aleaonlus.org
Cuntatos: Dr. Giovanni Idili 3939895202, mail progettostudio2010@libero. it
© RIPRODUZIONE RISERVATA
