A duus annus de sa dispidida, is Figli d’Arte Medas e totu sa comunidadi ollastina ant cuncordau una dii po afestai a su predi trentinu, intra is prus connotus in s’ìsula. S’atòbiu est giòbia su 10 de argiolas in sa sala polifuntzionali de bia Pompei

Po prus de 50 annus est stètia una ghia po s’Ollasta, traballendi aprimu in Biddanoa e agoa in Elini. Imoi, a duus annus de sa dispidida, su logu chi dd’at arriciu ddi fait custu omàgiu a don Pietro Vinante cun d-una dii de festa intitulada Don Pietro Vinante – Il Servizio e l’Eredità. S’atòbiu, cuncordau de is Figli d’Arte Medas e de su comunu de Elini, est po giòbia su 10 de argiolas in sa sala polifuntzionali de bia Pompei in Elini etotu (OG). Custu atòbiu est fatu cun s’agiudu de sa lei regionali 14 de su 2006 po arregordai a òminis e fèminas de importu de sa stòria e de sa cultura sarda.

SU PROGRAMA Sa dii est partzia in duas partis. A is 7 e mesu de a merii (h 19.30) un’arrexonada intitulada Don Pietro Vinante – 50 Anni di Testimonianza Civile e Religiosa, cun is arrelatas de su munsennori Antonello Mura, obispu de sa Diocesi de Lanusè e don Luca Fadda, su predi de Elini. Ddui at a essi finas su dotori Michele Lavra, cumissàriu de su Comunu de Elini, po donai is saludus istitutzionalis. Presentat Ivo Murgia, operadori culturali e spertu de lìngua sarda.
A is 9 oras (h 21) incumentzat su teatru cun su spetàculu Storie di Storia – Don Pietro Vinante, unu contu cun cantus e mùsicas scritas e cantadas de s’atori Gianluca Medas, acumpangiau a sa ghitarra clàssica de Andrea Congia e de is boxis de su Coro Ogliastra. Custu spetàculu, aintru de sa stòria de sa Crèsia sarda, contat sa vida de don Pietro, un’òmini simpri ma forti, e is acontèssius culturalis e religiosus de sa bidda de Elini.

Leau de su Comunicau de imprenta de su sòciu Figli d’arte Medas