Montesuana Bikers: totu prontu pro s’atopu de su 20 de mese de argiolas

Totu prontu pro s’atopu mototziclìsticu aparitzadu dae su sòtziu Montesuana Bikers chi dae tres annos pìnnigat a pari chentinaias de amantiosos de sa moto. Su 20 de mese de argiolas in Biddamanna, difatis, s’ant a atopare motos de totu sa Sardigna ma peri de foras, sena peruna distintzione tra marcas e modellos, bastet chi tèngiant duas rodas e peri de prus: motos de istrada, moto cross, vespas, scooter, quod e finas moto carrotzellas.

S’apuntamentu est pro domìnigu 20 de argiolas a ora de is 9 de magianu in sa pratza a iscacos de Biddamanna, in ue s’ant a fàghere is iscritziones e in ue s’ant a pòdere comporare is màllias tzelebrativas. A ora de is 2 segunda tapa in su padente de Santa Bàrbara pro pràndere totu in paris e posca mùsica finas a s’arbeschidòrgiu. Giai de oe is adesiones sunt prus de 800.