Democratzia partetzipada in Lanusè. Naschet su Lanusei Lab

Semper atenta a is bisòngios de is tzitadinos, sa Giunta comunale de Lanusè donat su benebènnidu a su “Lanusei Lab”, unu laboratòriu de democratzia partetzipada. Est unu tretu abertu in ue is bidditzolos etotu de sa bidda ant a pòdere tratare cun is assessores e cun su sìndigu pro discùtere de is sèberos e de is polìticas amministrativas chi sunt in programma.

Comente ispiegat Salvatore Acampora, assessore de sa cultura: “No at a èssere unu logu pro si chesciare o in ue protestare, ma unu tretu in ue totus ant a pòdere allegare e iscambiare ideas a manera patzìfica”. Giai provadu in su comunu de Bauladu, su laboratòriu de democratzia partetzipada, at donadu bonos resurtados. Sa prima setziada de su progetu s’est tenta custa giòbia colada, a canta su tzentru de agregatzione sotziale de Lanusè.