Sa cresiedda romànica de Santa Alenixedda, fraigada dae sos mòngios Vitorinos de Marsìllia bie s’agabbu de su 1200 e sos primos annos de su 1300, s’agatat collocada in unu terrinu a su foraidda de Casteddu, intre su bighinadu Europeu e su bighinadu CEP.
Su terrinu acanta fiat istadu pesada est su de su situ antigu meda de Santu Vetranu, in ue sunt istados atzapados paritzos repertos de època romana. Sa cresiedda est una pitica prenda de època medievale, costruida in pedra calcàrea, chi oe si podet annodiare petzi in sa fatzada. Presentat un’ùnica navada cun sas lìnias simpres, gasi comente simpre e de prègiu meda s’ammustrat sa fatzada a cabanna.
Custa est partzida in tres partes chi incuadrant s’essentziale portale, chi est sena de architrave, iscumpassadu dae un’arcu subra de cale cumparet unu piticu òculu tzirculare.
A cumpletare sa decoradura de sa fatzada sunt presentes diversos archetos pènsiles ogivales chi a s’internu presentant ateretantos arcos trilobatos. Prusaprestu sòbriu e elegante est fintzas su campanile a vela, a su cale, a dolu mannu, mancat sa campana.
Alenixedda, in limba sarda, est su diminutivu de Aleni (in italianu Elena). Sa cresiedda est duncas dedicada a santa Elena Imperadora; s’impreu de s’annomìngiu santa Alenixedda, podet èssere chi bèngiat dae sa netzessidade de la distìnghere dae s’àterulogu de cultu, prus mannu, no a largu meda de sa cresiedda, dedicadu a santa Elena .
A s’istadu atuale sa crèsia est sena de sos arredos sacros de unu tempus, e a discàpitu de sos sinnos de usura ladinos, resesset comente si siat a mantènnere elementos importantes de sa bellesa antiga sua.
Est pretzisu agiùnghere chi mancari diversos annos a oe est istada ogetu de un’importane, cumplessu e longu percursu de traballu de restàuru, suta de su controllu de sa Subrintendèntzia, su tempus non paret èssere meda amistiosu cun sa crèsia, e a dolu mannu sunt giai visìbiles diversos sinnos de degradu subra de sos muros laterales.
“Progetto finanziato con l’Avviso Pubblico IMPRENTAS annualità 2021-2022”