S’ecuinòtziu de beranu marcat su cumintzu de una fase noa de s’annu, cussa de su calore e de sa lughe. Est su tempus chi sa natura torret a nàschere. In Sardigna, comente in unas àteras culturas, custa data est acapiada difatis a sa rinàschida e a sa fertilidade.
Una de sas traditziones de Pasca Manna chi agatamus in belle totu sa Sardigna est cussa de s’abrontu de “Su Nènnere”. Sa prima chida de Carèsima est usàntiza pònnere in unu pratu gopùtzulu una giunta de trigu in pitzu de cotone o deretamente de terra niedda. Su pratu posca benit arrimadu in s’iscuriu, comente suta su letu o in s’armuà. Custu pro ite sos semeneddos chi naschent non depent chistire sa lughe, sinono torrant birdes pro more de sa fotosintesi clorofilliana. Imbetzes in s’iscuriu abbarrant grogos.
Ogna tantu tocat a los abbare, ma non meda, pro more chi non s’allenent. Su Giòbia Santu su Nènnere si portat a crèsia, a pustis de èssere istadu decoradu cun fetas coloradas e frores. Si si cheret otènnere una cumpositzione particulare paris cun su trigu faghent a semenare peri lentìgias. In Casteddu Su Nenniri benit regaladu a parentes e amigos comente sinnu de felitzidade e de richesa e postu in mesu a sa meda.
Su costumàntzia sarda de ammaniare su Nènnere si penat chi siat de rìgine pagana, fortzis mediorientale. Su Giòbia santu sos pratos decorados benint collocados suta s’altare de sa crèsia o a sos pees de rughe de Gesùs mortu. Custu fiat unu donu de fide de sas fèminas de Sardigna a su bonu Gesùs. Comente amus naradu su ritu est de origine mediorientale, fortzis fenìtziu. Difatis sas fèminas istimaiant su deus issoro Adone, chi, segundu sa religione issoro, torraiat a nàschere a vida noa, bessende dae su regnu de sos mortos, duas bias s’annu, e est a nàrrere pro su solstìtziu de istiu e pro s’ecuinòtziu de beranu. Tando sas pitzocas semitas, pròpiu omente sas mugeres sardas, ammaniaiant custos vasos chi mutiant Herme o Giardini de Adone (deus de sa bellesa e de s’amore) collechendeddos a sos pees de sos ìdolos de Adone, bene decorados cun nastros, frocos e fetas coloradas, e abbandonende·si a una cuntentesa isfrenada, dantzaiant a inghìriu a sos ìdolos, pro otènnere un’annada bona.
“Progetto finanziato con l’Avviso Pubblico IMPRENTAS annualità 2021-2022”