Su Cafè Literàriu de Arbatassa movet fache a àteras aventuras e dae fissu comente fiat a in antis, si mudat a biagiante. A discinire custu issèberu “tramudòngiu” de su sòtziu culturale, ghiadu dae Virginia Murru, at a èssere s’addòbiu prevìdidu pro sàbadu 23 de freàrgiu a is 5 de merie in su palàtziu comunale de Triei. Gràtzias a su cumbidu personale de sìndigu de sa comuna de is martzigusas, Mariano Muggianu, su Cafè oramai istòricu de Tortolì at a chircare de torrare a ingendrare is atmosferas suas in un’àtera bidda gràtzias peri a s’invitadu de sa prima “trasferta” chi at a èssere Cristian Marrosu. S’iscritore, acumpangiadu dae sa boghe de s’atritze tortoliesa Tiziana Murino, at a propònnere a su pùblicu in sala unas leturas bogadas dae s’ùrtimu romanzu cosa sua. Comente a semper totu is presentes ant a pòdere intervènnere durante sa serada, leghende poesias e narende is pensamentos issoro. Margherita Musella at naradu: “Su Cafè Literàriu giai dae meda at brincadu is làcanas, difatis, siat is artistas, siat su pùblicu est formadu dae gente de ogna logu. Su primu passu pro su Cafè Literàriu “tramudòngiu” est giai istadu betadu. At a èssere unu praghere mannu pro nois a portare unu pagu de ispàssiu e de cultura in is biddas a canta nos ant a acollire. Torramus gràtzias a su sìndigu de Triei pro èssere istadu su primu a nos àere abertu is ghennas de sa comuna sua”.
