Bona renèssida pro su primu “aperiboat” a sa tortoliesa

S’aperiboat, aparitzadu domìnigu coladu dae is meres de su Bellavista Bio Cafè de Tortolì, at otentu una renèssida manna. Is clientes fitianos de su locale prus amadu dae is giòvanos tortoliesos, ant atopadu totu cantos a su molo de ponente de Arbatassa a ora de is 8.30 de su sero, in ue ddos isetaiat sa barca Glentor a canta ant coladu sa serada bufende e ballende cun sa mùsica de Giacomo Mannai e Manuel Pablo, agiuados dae is vocalist Smilzo de Radio Rama e Stefano Pinna.

Is meres de su locale, is frades Giorgio e Roberto Perino, ant naradu: “Semus cuntentos mannos chi sa serada siat andada bene. Pro Tortolì si tratat de una novidade ma a su chi paret est pràghida meda, pro custu amus a fàghere a manera de repìtere s’eventu!”.