Cala Sìntzias. Comandini: est pretzisu chi sa Giunta abolat deretu su bandu de bèndida.

“Su bandu de gara proclamadu dae Bonifiche Sarde S.p.A. in licuidatzione, pro sa bèndita de is terrinos a probe de mare de Cala Sìntzias, in Castiadas, depet èssere abolidu!”. Custu est su chi at naradu su consigieri regionale de su PD Piero Comandini.

“Non est cumpatìbile- at sighidu Comandini- chi in custu momentu gosi dìligu, cun su Pianu Paesagìsticu galu in discussione, una sotziedade in licuidatzione controllada dae sa Regione pòngiat in bèndida tretos de sa costa sarda de grandu importu naturale”.

In fines, at naradu Comandini, “diat a èssere interessante ischire si su Cummissàriu incarrigadu de sa licuidatzione a in antis de fàghere su bandu de gara apat retzidu su cunsensu de s’atzionista de riferimentu, comente si costumat a fàghere in custas tzircustàntzias”.