Cantzelladu su patu de istabilidade. Sabatini: “s’at a favorire sa ripresa econòmica”
Ivan Marongiu
Su Presidente de sa Cummissione Programmatzione, bilàntziu e polìticas europeas de su Consìgiu Regionale On. Franco Sabatini mustrat grandu satisfatzione pro su resurtadu bonu cunsighidu dae sa giunta Pigliaru a pustis de s’addòbiu de oe cun su guvernu.
“Su de non tènnere prus su vìnculu de su patu de istabilidade a cumentzare dae su 2015” at naradu Sabatini “ nos at a permìtere de programmare mègius is risursas finantziàrias chi serbint a is polìticas de isvilupu de is territòrios nostros. Est unu resurtadu importante, pro ite su patu de istabilidade non nos cunsentiat de impreare is intradas nostras, ma dae su 2015 no amus a tènnere prus custu impèdumu. Su mèritu de est de su Presidente de sa Regione Sardigna, Francesco Pigliaru e de s’assessore al su Bilàntziu e Programmatzione Raffaele Paci”.
“Como– at concruidu Sabatini – depimus aunire is fortzas e traballare totu paris pro fraigare polìticas econòmicas capatzes de favorèssere is investimentos e s’ocupatzione”.
