Samugheo (Aristanis) s’abrontat a festare sa torrada de una cuntzitadina chi totus timiant de non torrare a bìdere mai prus: Rossella Urru, sa pitzoca de bintinoe annos secuestrada in Algeria su 23 de ladàmene coladu. Difatis, Rossella est istada in fines liberada eris sera in su nord de su Mali, a pustis de una presonia durada belle treghentos dies e a pustis de unu muntone de boghes chi annuntziaiant sa liberatzione sua ma chi ogna borta beniant negadas. Sende traballande in su Comitadu Internatzionale pro s’Isvilupu de is Pòpulos, fiat istada furada dae unu trupa de militzianos armados in unu campu de refugiados saràhui in Algeria, in paris a àteros duos collegas suos ispagnolos: Ainhoa Fernández del Rincón e Enric Gonyalons. Rossella at a lòmpere custu sero a Ciampinu, in Roma, in ue, a dda retzire, giai ddoe sunt su babbu e sa mamma. Giulio Terzi, su ministru de is Èsteros italianu, at decraradu: “Rossella est unu sìmbulu de su coràgiu, de sa dignidade e de s’orgògliu de is fèminas italianas, chi traballant in logos de cooperatzione. Est fìgia de sa mègiu Itàlia”. Totus sunt isetende, iscrètidos, de cumprèndere bene ite est acadèssidu in totus custos meses e ite ddoe est a palas de custu ricatu. Mescamente tocat a cumprèndere comente is tres cooperantes sunt istados iscatividados. Pro mèdiu de un’iscàmbiu de presoneris o comente? Una fine bona pro unu fatu chi at fatu leare matana a unu muntone de gente e chi at fatu passare unos momentos malos a s’Itàlia e prus che totu a sa Sardìgna.